Azken euriteek kaltetutako auzotarrei laguntzeko 60.000 euro emango ditu Getxoko Udalak
Imanol Landa Getxoko alkateak udal zerbitzu juridikoei agindu die 60.000 euroko partida prestatzeko, pasa den asteazkeneko (ekainak 16) euriteek kaltetutako auzotarrei diru-laguntzak emateko. "2008ko ekainaren 1ean eta 8an izandako uholdeetan egin zuen bezala", agintari jelkideak "konpromisoa" hartu du aipatu diru-laguntza emateko, tokiko iturriek zabaldu dutenez; eta adierazi du, gainera, "dirutza hori handiagotu litzatekeela behar izatekotan". Laguntza horiek alkatearen dekretuaren edo datorren asteko gobernu batzordean hartutako akordioaren bidez arautuko dira. Imanol Landak gaur azaldu duenez, “auzotar batzuk etxeetatik ateratzeko gastuak, premia biziko etxeko tresnak erosteko, eta etxebizitzak, trastelekuak, eta abar konpontzeko izango dira emango diren subentzioak. Hau da, 2008ko uholdeetan diruz lagundu ziren antzeko gaietara bideratuko dira”. Argazkian, Salsiduko zubia zena.
Uholdeak uholde, aurrera doaz Uraren Euskal Agentziak Gobela inguruan egiten dabilen premiazko lanak. Horien ondorioz, astelehenean, hilak 21, trafikoa moztuko dute, goizeko 9etatik aurrera, Leioa Etorbidean, Baserria eta Gobelbide kaleen artean. Halere, autobidera sartu ahal izango da aipatutako azken kale horretatik. Kalea ostiralera arte, hilaren 25 arte, egongo da itxita. Orduan berriro zabalduko dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun