Hona hemen Getxoko Auzokideok topagunearen sorrera manifestua:
Azkenengo hilabeteotan bildu eta gero, behean sinatzen dugun taldeok ondorioztatu ditugun azalpen batzuk argitara eman nahi ditugu. Lehenengoz, gure herrian gertatzen ari den hirigintza-garapenak kezkatzen gaitu, horren irizpideek etorkizunean arazoak ekar ditzaketela, eta gaurko egoerari oso soluzio gutxi eskaintzen dizkiotela uste baitugu.
Hori dela eta, Udaletxe eta beste erakundeekiko harreman berriak bultzatu nahi ditugu, auzotarron parte-hartze zuzenagoa eta demokratikoagoa lortzeko helburuz, eta guztiongan eragiten duten egitasmo eta ideien gaineko erabakiak hartzeko orduan gure iritzia eta ikuspuntuak ere kontuan har ditzaten.
Getxo bizigarriagoaren alde lan egiten dugun pertsonak eta taldeak gara; eta xede horrekin, alternatiba batzuk eta geroko Getxori buruzko gogoeta publikoa bultzatuko ditugu, Getxo izan dadin oso udalerri eroso, jasangarri eta zentzuzko oinarrien gainean eraikia.
Eztabaida horietan parte hartu nahi duten pertsona eta talde guztiak gonbidatuta daude.
Getxoko Andra Mari Auzo Elkartea.
Salsidu-Zubietako Auzotarron Elkartea.
Gobelak kaltetutako Neguri Langileko Auzokideen Elkartea.
San Nikolas Auzo Elkartea.
Algortako Lagun Elkartea.
Antena Ez-Getxo.
Getxon Bizi Auzo Elkartea.
Ostiral arratsaldean Getxo udalerriko auzo desberdinetan ematen ari diren aldarrikapenei buruzko erakusketa paratu zuten Algortako Telletxe plazan. Auzokideok auzo elkarte eta herritar taldeen topagunea izan zen ekimena antolatu zuena. Erakusketak jakin-mina piztu zuen herritarren artean. Besteak beste, Andra Mari Auzo Elkarteak Ibarbengoako geltoki berriaren eraikuntzak sortu dituen kalteak erakutsi zituen, Antena Ez elkarteak kutsadura elektromagnetikoari buruzko azalpenak eta Getxon dauden antena batzuen irudiak zabaldu zituen; eta Getxon Bizi Auzo Elkarteak duela hamabost egun Telletxen bertan egondako Begoña Gazteluko galeriei buruzko erakusketa berriro jarri zuen ikusgai. Horiez gain, sortu berri den Aldapan Bizi, Getxo Antzokia hain handia egitearekin ados ez dagoen San Nikolas auzo elkartea eta uholdeek kaltetutako Neguri Langile eta Salsidu-Zubilleta auzokideen elkarteak bertan izan ziren. Hain zuzen ere, azken bi horiek Uholdeetako Batzorde Berezian parte hartzeari utzi diotela zabaldu du "El Correo Español" egunkariak, bereziki joan den asteazkenean bizi izandako une larrien ostean. Argazkian, hainbat herritar erakusketa ikusten. Argazki gehiago ikusteko sakatu hemen.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun