Alkateak gehitu du helburua bi egoerak desberdintzeko lan egitea dela asmoa, "batez ere gazteek alkohol gehiegi hartzearen kontra egitea". Landak gizalegezko jokaerak izateko eskatu du: “guztiok errespetatzera etortzen direnak ongietorriak izango dira herri zabala garelako. Baina, baldarrek, istiluen bila etortzen direnek, Getxon aurrekaririk gabeko polizia operazioa aurkituko dute”, nabarmendu duenez. Azkenik, esan du gazteek, batez ere adin gabeek, alkohol gehiegi hartzearen arazoari hezkuntza alorretik egin behar zaiola aurre, “ezin dugulako ahaztu alkohola gure gizartean toki guztietatik dagoela eta gure zeregina, erakunde, hezitzaile eta guraso bezala, prebentzioa lantzea dela, gazteek alkoholaren arriskuak eta beren ondorioak ikas ditzaten". "Donibane gauean dugun egoera hezkuntzan dagoen gabeziaren adierazgarria da”, zehaztu du Landak.
Kontrol neurriak
Udaltzaingoak era zorrotzagoan zainduko du adingabeei udalerriko establezimenduetan alkoholik ez saltzea eta, 18 urtetik beherakoei, edari alkoholikoak dituzten jakiteko kontrolak egingo dizkiete. Horiek aurkitzekotan, atzeman eta beraien arduradunei deituko diete poliziek. Kontrol horiek gazteak elkartzen diren gune desberdinetan egingo dituzte. Adin gabeei alkohola saltzeagatik 3.005 euroko isuna jaso dezakete establezimenduek; baita adingabeei erosten dieten nagusiek ere. Hondartza aldean, polizia operazio berezia ezarriko dute Udaltzaingoaren eta Ertzaintzaren partaidetzarekin, sor litezkeen gertaerak kontrolatzeko. Gainera, inguruko urbanizazioetan ere zainketa berezia izango da. Era berean, operazio koordinatua metroko geltokietan ere eramango dute aurrera; zaindari, langile eta tren gehiago izateaz gain, egun horretarako aurreikusitako jarduerak aipatutako bi polizi taldeek koordinatuta egongo baitira.
Babes Zibila
Suteak ondo amatatzeko plana ere jarriko dute martxan. Era berean, erredurak ekiditeko berehalako laguntza egongo da prest, baita ebakiak edo alkoholarekin sortzen diren egoerak artatzeko ere. Horretarako, Babes Zibilak aginte postu bat jarriko du hondartzaren goiko partean eta, bertan, Getxoko Babes Zibileko zein DYAko koordinazio arduradunak egongo dira.
San Juan sua ospatzeko urtero ekainaren 23ko gauean egiten diren ekimenak direla eta, Getxoko Udalak kontrol neurriak gogortuko ditu eta baliabideen zein poliziaren arteko koordinazioa areagotuko du, "ospakizunak era atseginean eta osasuntsuan izan daitezen, batez ere Arrigunaga hondartzan egiten direnak". Gauzak horrela, egun horretan, Getxoko Udaltzaingoak eta Ertzaintzak operatibo koordinatu garrantzitsua jarriko dute indarrean, "istiluak eta auzokideentzako eragozpenak gutxitze aldera". Polizia taldea %50 handituko dute. Imanol Landa alkateak adierazi du, "Donibane gaua gozatzekoa dela eta ospakizunaren lehenengo orduotan gurasoak beren seme-alabekin elkartzen direla, oso giro baketsuan eta atseginean udalerriko sute desberdinen inguruan". "Familia giroa izaten da horietan, eta jendeak era bidezkoan eta zuzenean jokatzen du. Jakin badakigu batzuetan, orduak aurrera joan ahala, ez-gizalegezko jarrerak sortzen direla, pertsonekiko eta hiri-altzairuekiko errespetu faltakoak eta guk egoera horiei aurre egiteko lanean segituko dugu, horiek kezka handia sortzen baitute herritarrengan, batez ere Arrigunagako hondartzako ingurukoen artean", gaineratu duenez. Argazkian, udaltzain bat autoan.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun