Eduardo Coste kalea 700 metro ingurukoa da, eta bertan, zumardia sortuko dute, zirkulazioaren noranzko bakoitzean errail bat baino ez duena izango (orain arte noranzko bakoitzeko bi bide bazeuden ere), luzetarako aparkalekuekin. Aparkaleku horien kopurua handitzeak inguruan dauden garraio publikoak erabiltzeko baldintzak hobetuko ditu (Bizkaia Zubia ez ezik), itsasadarraren bestaldera igarotzen diren pertsonentzat. Horrez gainera, bidegorri zatia egingo dute, moila aldekoa, Maximo Agirre kalean dagoenarekin lotzeko. Horrek, halaber, Areetako metro geltoki aldean dagoen bidegorri zatiarekin bat egiten du. Hartara, Leioa Berangorekin lotuko dute bidegorrien udal sarearen bitartez.
Hesi arkitektonikoa
Era berean, oinezkoentzako ibilbideak berrituko dituzte eta oinezkoen pasabide garaiak ipiniko dituzte; espaloiaren eta gune horretako autobus geltokien artean dagoen aldea kenduko dute, autobusen geralekuetako itxarote-guneak zein bidaiariena ere zabalduz; obrak eragindako alderdiko zerbitzuak (euri-hodien sarea eta argi berriak, besteak beste) zaharberrituko dituzte; eta 130 zuhaitz handi landatuko dituzte zintarrian lerro-lerro sartuta. Alkatearen esanetan, "kalea atseginagoa egiteko proposamena da, beste inorentzat baino auzotarrentzat izango den kalea. Horretaz gain, Tomas Olabarri moila eta bere inguru osoa Areeta barruan sartu nahi dugu, orain artean Eduardo Coste hesi arkitektonikoa baitzen. Aldi berean, Bizkaia Zubiari, gure baliabide turistiko nagusienetakoari, balio handiagoa emango diogu”.
Zirkulazioari dagokionez, lorez hornitutako biribilgunea jarriko dute ibilgailuen mugimenduak hobetzeko. Bestalde, oinezkoentzako pasabide garaien eraginez zirkulazioa moteldu egingo da. “Segurtasunaren gaia ezinbesteko izan da proiektuaren diseinua egiterakoan. Hau da, biribilgunea aparkalekuekin nahasten da noranzko bakoitzean errail bat eta semafororen bat ere kenduz arintasuna ez moteltzeko. Baina abiadura ordea, geldotu egingo da”, nabarmendu du Joseba Arregi Hirigintza zinegotziak.
Areetako Eduardo Coste kalea berriz antolatzeko lanek gune hori eta bere inguruak, Bizkaia Zubiko plaza barne, "atseginagoa eta hiritarragoa bihurtuko dituzte", Imanol Landa Getxoko alkateak adierazi duenez. Obrak hasita daude jada. Gauzak horrela, kalearen albo banatan luzerako aparkalekuak ipiniko dituzte eta horrek garraio publikoa erabiltzea erraztuko du. Lanok 6 hilabete inguru irautea aurreikusi dute eta horretarako aurrekontua 2.000.000 eurokoa da, E Planaren kontura. Alkateak aipatu duenez, "Bizkaiko Foru Aldundiak Uribe Kostako korridorea eraiki zuenetik, udalerriko sarbide hau erabiltzen duten autoak gutxiago dira eta, horregatik, beharrezkotzat jo dugu kale horretako espazioak birbanatzea egungo erabilerara egokitzeko. Foru errepideak hiri kaleak bihurtzeko jarduera ildoarekin bat dator egitasmoa, Zientoetxen egiten ari garen bezala eta Ollarretxen egingo dugun bezala”. Argazkian, obren proiektuaren irudia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun