Euskal Fondoari 50.025 euroko diru-laguntza ematea onartu du Getxoko Udalak. Oraingoan, Nikaraguako Tipitapa udalerrian aurrera eramango diren ibai drainatze proiektu baterako izango da subentzioa. Egitasmoa saneamenduko oinarrizko egitura egitean datza, 3.300 biztanle dituen herrirako, hain zuzen. Ekimen horrekin, bertako haurren eta talde ahulen artean gaixotasunak murriztu nahi dituzte, zehaztu dutenez. Begoña Ezkurra Lankidetzako Garapeneko zinegotziaren hitzetan, “higiene eta osasun baldintzak hobetzea da helburua, era horretan ur zikinetan egoten diren eltxo ugarik eragiten dituzten gaixotasunak ekiditeko". Argazkian, 2008ko bukaeran lanak egin behar dituzten Tipitapako ingurua / © Getxo.net.
Getxoko Udala 2001ean sartu zen Euskal Fondoan. Harrez geroztik, nazioarteko lankidetzako ekimenak bultzatzeaz eta koordinatzeaz gain, herritarren partaidetza eta hausnarketa prozesuak bultzatu ditu. Urte hauetan guztietan, getxoztarrek Tipitapa herriari bidalitako diru-kopurua 388.814 eurokoa izan da, proiektu desberdin batzuetarako, horien artean udal prestakuntzarako, garraiobidetarako, azpiegituretarako edo ingurugirorako. Tipitapa udalerria Managuako (Nikaragua) ipar mendebaldean dago. 975 kilometro koadroko azalera eta 109.000 biztanle ditu. Bere zerbitzuetako eta merkataritza jarduerak oso handiak dira eta horregatik urtero Managuatik 10.000 bat lagun joaten dira Tipitapara, bertan lan egitera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun