Gaur egungo udako ikastaroak hezkuntza errefortzu bat dira, kirol jarduerekin batera eskaintzen direnak, udal iturriek aipatu dutenez. Uztailean eta abuztuan egiten dira eta Lehenengo Hezkuntzako 6. mailako eta Derrigorrezko Bigarren Hezkuntzako lehenengo zikloko ikasleei zuzenduta daude (12 eta 14 urte bitartekoei). Aurten udako ikastaroak Algortan egingo dira, Getxo Kirolak erakundearen egoitzaren ondoan dauden instalazioetan (Fadurako antzinako garagardotegian), uztailaren 1etik abuztuaren 31ra arte.
Jarduera ugari
15 irakaslek, Getxoko Udalak kontratatutakoak, hauek eskatutako hizkuntza ereduan arreta eskainiko diete ikasleei, beren jatorrizko hezkuntza eredua zein den kontuan harturik. Kirol atalean, Getxo Kirolak erakundeko begirale adituak izango dira eta haiekin, besteak beste, igeriketa, tenisa, atletismoa, saskibaloia, boleibol, aerobic, padel, futbola, herri kirolak, pilota eta abenturak landuko dituzte. Hori guztia jokoekin eta eztabaidekin osatuko dituzte. Halaber, pistan, eta praktiken arduraduna den udaltzain baten eskutik, mugikortasun seguruaren aldeko jarduerak egingo dira, eta beste hainbat irteera ere egingo dituzte.
Getxoko Udalak urtero antolatzen dituen udako ikastaroek 25 urte beteko dituzte aurten. 1985ean udal Hezkuntza Sailetik “udako errekuperaziorako ikastaroak” izenarekin sortutako ekimena da. Orduan, ikasgairen bat irailerako utzitako 12 eta 14 urte bitarteko gazteei, uztailean eta abuztuan, ikasketak eta kirola bermatzeko aukera bat ematea zen helburua. Ondoren, hezkuntza erreformarekin (eta iraileko azterketen desagerpenarekin batera), jardueraren kontzeptua aldatu zen eta “Udako ikastaroak” izena hartu zuen ekimenak. Urte hauetan zehar 4.836 ikaslek parte hartu dute horretan, batez ere ikasle getxoztarrek, baina baita inguruetako ikasleek ere. Udako ikastaroetan parte hartzeko izen-emate epea uztailaren 9ra arte egongo da zabalik, matrikularen prezioa 29,30 eurokoa dela. Eskaera orriak herritarrentzako arreta bulegoetan bete beharko dira, udaletxekoan, Getxoko Benturillena kalekoan, Algortako Juan Bautista Zabalakoan zein Itzubaltzeta / Romoko Aurrezki Kutxakoan, 08:00etatik 14:00etara. Argazkian, Fadura kiroldegian hainbat jarduera egingo dituzte / © Getxo.net
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun