Azken euriteek kaltetutako auzotarrentzako diru-laguntzak onartu ditu Getxoko Udalak
Getxoko Gobernu Batzordeak 60.000 euroko partida prestatzeko akordioa onartu du aste honetan bertan, joan den asteazkenean Gobelak eta bere ibaiadarrek eragindako uholdeetan kaltetuak izan diren auzotarrei diru-laguntzak emateko. Imanol Landa tokiko alkateak azaldu duenez, auzotar batzuk etxeetatik ateratzeko, premia biziko etxeko tresnak erosteko eta ibilgailuentzako izango dira subentzioak; baita etxebizitzak, trastelekuak, eta abar konpontzeko ere. Hau da, 2008ko uholdeetan diruz lagundu ziren antzeko gaietara bideratuko dira. Merkataritzarako laguntzak ere izango dira: saltokiak konpontzeko eta ur hornidura, zaborren bilketa eta estolderiagatiko tasen ordainketa konpentsatzeko, hurrenez hurren. Azkenik, etxebizitzetan, garajeetan, trastelekuetan edo saltokietan kalteak konpontzeko obretatik eratorritako udal zergen ordainketa konpentsatzeko laguntzak emango dituzte.Udal agintariak gaineratu duenez, diru-laguntza horiek, behar izatekotan, handitu egingo dira. Argazkian, ekainaren 16an jasotako eurite gogorrek, udalerriko hainbat garaje urperatu zituen.
Tokiko iturriek azpimarratu dutenez, "diru-laguntza hauek bateraezinak izango direla edozein aseguru-etxe edo administrazio publikoren aldetik jasotako kausa bereko beste pertzepzio batzuekin. Ukitutako etxebizitzan bizi den eragindako familia-unitateko edozein kidek, arrazoi berberagatik, edozein eratako konpentsazio ekonomikoa jasotzen badu edozein aseguru-etxe edo administrazio publikoren aldetik, Udalari horren berri eman beharko dio eta zenbateko hori Udalak emandako diru-laguntzatik kenduko da, eta horren onuradunak dagokion zenbatekoa itzuli beharko du, onartutako akordioan aipatzen denez". Laguntza-eskaerak aurkezteko epea datorren irailaren 3an amaituko da eta eskabideak Udaltzaingoko herritarren arretarako gunean (Algortako Alango kalea, 25) aurkeztu beharko dira, astelehenetik ostiralera, 08:30etik 20:00era bitartean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun