Ohi bezala, arratsalde-gaueko lehenengo orduotan hainbat sute piztu ziren udalerriko hainbat txokotan, eta horietan familia eta ume eta gazte ugari elkartu ziren, inolako istilurik gabe. "Balantze bezala, esan daiteke, San Juan gauerako antolatutako zaintza jarduera bereziak ahalbidetu duela gaua nolabaiteko normaltasunarekin eta aurreko urteetan baino istilu gutxiagorekin igarotzea; legeak agintzen duena betez, gainera", Getxoko Udaltzaingoak adierazi duenez.
Alkoholemia kontrolak
Polizia eta osasun neurrien osagarri moduan, Eusko Jaurlaritzako Drogamenpekotasun Zuzendaritzak atzo arratsaldeko zortzietatik gaur goizaldeko ordu bietara hiru karpa jarri ditu, alkohola gehiegi edateari aurre egiteko, kalteak eta arriskuak murrizteko politikaren barruan. Karpapean sendagile, psikologo, pedagogo eta gizarte hezitzaile banak osatutako Sasoia taldeak alkohol kontrol kualitatiboak (positiboa edo negatiboa atzemateko) egiten ibili dira, alkohol gehiegi hartzeak dituen ondorioei buruzko informazioa emateaz eta sentsibilizazioa zabaltzeaz gain. Guzti horrekin, datu estatistiko batzuk (adina, sexua, jatorria eta kontrolaren emaitza) landu dituzte. Aldi berean, bertaratu direnen artean 1.600 bokatatxo, 5.600 sobau txiki, 50 kilo kakahuete eta 800 litro ur banatu dituzte, hartutako alkoholaren ondorioak murrizteko. Atsedena hartzeko gunea ere izan dute. Hori guztia Drogamenpekotasun Zuzendaritzak ordaindu du. Gastua 5.000 bat eurokoa izan da.
Guztira, 7.000 lagun inguru bildu ziren atzo gauean San Juan gaua ospatzeko, Getxoko Arrigunaga hondartzan eta inguruetan, Getxoko Udaltzaingoak emandako datuen arabera. Iaz 10.000 lagun izan ziren gune horretan bildu zirenak. Imanol Landa alkateak ere eman ditu horren gaineko argibideak (mp3) goizeko prentsaurrekoan. Istiluak eta auzokideei eragozpenak murrizteko helburuarekin polizia operazio berezia zabaldu zuten. Bada, 00:11tik 5:14ra 10 lagun edanda zeudela jakin zen, eta horietako bat osasun zentro batera eraman behar izan zuten, adierazi dutenez. Arrazoi berberagatik, iaz, 6 pertsona eraman zituzten. Halaber, 40 litro alkohol atzeman zizkieten adin gabekoei 21:30ak eta gauerdia artean, Udaltzaingoak egindako 15 jardueretan. Bestalde, 8 pertsona salatu dituzte kalean txiza egitea egotzita, eta bakarra zorroa lapurtzea leporatuta. DYAk 9 lagun artatu zituen, horietako bat, antza, liskar batean nahastutakoa (2009an 20 pertsona artatu zituzten). Ertzaintzak, bere aldetik, 3 lagun atxilotu zituen erasoak egotzita. Argazkian, atzoko San Juan gaua Arrigunagan / © Getxo.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun