Getxoko PPk azken euriteak gertatu eta egun batera iragarri zuen Imanol Landa alkate jelkidearen kontrako gaitzespen idatzia aurkeztuko zuela, "bi urte hauetan uholdeak eta auzotarren ezinegona saihesteko lan eskasa egin duelako". Marisa Arrue tokiko popularren bozeramaileak adierazi zuenez, "ezin dugu ahaztu, EAJ agintean egonda, Gobelaren arazoak 20 urte daramatzala kaxoi barruan gordeta. Eta, orain, obrak hasi direnean, bueltan etorri da Diputazioa EAJ buruan eta 20 egunez gelditu du guztia, gerra politiko soil batengatik. Eskerrak Jolasetako zubia goiz bakar batean bota zutela, bestela, Neguri aldean, katastrofe baten aurrean egongo ginateke". Uholdeen egun berean Getxo Antzokiari buruzko prentsa oharra egiten egotea egotzi zion Landari Arruek.
Getxo Antzokia
Hain zuzen ere, Getxo Antzoki berriaren proiektuko hirugarren fasearen onarpena legez kanpokotzat joz, mozioa aurkeztu du biharko PPk; baina erabaki hori atzera botatzen ez badute auzitara joko duela ohartaraziz ere. Horren harira,“Getxo Antzokia faseka egitea "legezkoa" dela aipatu du gaurkoan Landa alkateak. "Udaletxeko Idazkaritza Nagusiaren txosten batek horrela egiaztatzen du eta legeak publizitate eta kontrataziorako sistemen gainean ezarritako baldintza guztiak beteko ditu. Erabat lasai gaude jarduera honekin. Proiektuaren egikaritza faseka egingo da teknikariek etengabe berraztertzen den proiektua hobetzeko denbora gehiago izan dezaten”, adierazi duenez. PPk egotzitako gardentasun ezaz, Landak esan du proiektua zazpi aldiz eraman dutela Udalbatzara, eta zenbait alditan alderdi guztien adostasuna ere jaso duela, PPrena barne.
Ollarretxe
Udalbatzak urrats garrantzitsua emango du Ollarretxe kalea, Algortako Salsiduko biribilgunetik Benantzioko bidegurutzera arteko tartean, herri barruko bidea bihur dadin, tokiko iturriek aipatu dutenez. 1997an Bizkaiko Foru Aldundiarekin sinatutako hitzarmena berretsi eta garatu nahi dute. Bertan, Udalari hainbat errepide ematea jasotzen da, tartean Ollarretxekoa. Aldundiak, 2011 eta 2013 artean, 1.500.000 euro emateko konpromisoa hartu du eta dirutza horrekin, Udalak, errepide hori herri barruko kale bihurtzeko egokitze lanak egin nahi ditu. “Kale atseginagoa, lasaiagoa izango da, ibilgailuak abiadura geldoagoarekin joango dira, kalea argitsuagoa eta seguruagoa izango da, aparkaleku gehiago edukiko ditu eta, hitz batean esanda, auzotarren zerbitzura egongo da. Obra nagusia datorren urtean hasiko bada ere, 2010ean saneamendu berria ipintzeko eta bidegorria egokitzeko lanak egingo dira. Obra hauek auzotarren bizi-kalitatea hobetuko dute”, esan du Landak (mp3).
Gobela "eztabaidarako eta ika-mika politikorako" erabiltzea egotzi dio Getxoko PPri Landa alkateak
Imanol Landa Getxoko alkatea hedabideen aurrean agertu da gaur goizean bihar udaletxean izango den udal batzarreko hainbat gaiei buruz berba egiteko. PPk, bihar, Gobelako ibaiak eragindako azken uholdeetan alkatearen gestioa gaitzesteko aurkeztuko duen mozioaren harira, tokiko agintariak adierazi du ez duela inolako ondorio juridikorik izango. Landarentzat, “PPk mozio honen bitartez ernegarazi, tentsioa bizitu nahi du eta hedabideetan leku bat egin nahi du, horretarako uholdeak eta auzotarren egon eza eta larritasuna erabiliz, guztiz salagarriena dena". "PP da Gobela eztabaidarako eta ika-mika politikorako erabiltzen duen oposizioko alderdi bakarra. Auzotarrek egin beharreko hausnarketa da”, gaineratu duenez. Alkatearen ustez, “bere helburuak lortzeko, PPk ez du inolako zalantzarik datuak faltsutzerako orduan, gobernua ahultzeko, hauteskundeetan emaitza hobeagoak bilatuz”. Landak "oposizio konstruktiboa" eskatu du, “ezezkoa sistematikoki erabiltzen ez duena eta Getxorentzat, Gobela ibaiarena bezalakoa, estrategikoak diren proiektuak bereizten dakiena". Alkate jelkidearen iritziz, Gobelaren auzian udal alderdi politiko guztiek batera joan beharko lukete Eusko Jaurlaritzak ibaiaren proiektu orokorrak lehentasuna duela onar dezan; baita gai batzuetan "dialektika politikoa alboratu" beharko litzatekeela ere. Argazkian, aurreko osoko bilkura bat / © Getxo.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun