Udako ekinozioa ospatzeko asmoz, makina bat su piztu da bart Uribe Kosta eta Erandioko soro, larre, baserri, hondartza eta plazetan. Gehienak lasai eta irribarretsu piztu, salto egin eta itzali egin ziren, zorte txarra alde batera utzita eta desioak eskatuta. Itzubaltzeta / Romon, berriz, Getxoko Udaltzaingoko bost poliziek bahitu egin zuten bertako gazte asanbladak antolatutako suterako egur multzoa. Euskaldunen usadio zahar eta pagano horretaz disfrutatzera joandako auzokide batek UKBERRI.NETi adierazi dionez, gauerdia heldu baino lehen izan zen gertaera. Udari sabel beteaz eta zintzar bustiaz harrera egiteko gazteak sardina jana eta parrillada prestatzen ari zirela, bost udaltzain jarri ziren udal espaloian area artean erretzear zegoen zura piloa eta gazteen artean. Argazkian, operazio polizialaren une bat / cc-public domain.
Haien atzean, udal langileak aritu ziren xaflak kamioi batean kargatzen eta bukatzean alde egin zuten poliziekin batera. Ondoren, gazteek inguruetako hainbat egur batu zuten eta dezente txikiagoa bazen ere, sua piztu zuten. Izan ere, pasa den hamarkadan herrian galtzear zegoen ohitura berreskuratu eta mantentzeko asmoa hartu zuen orain dela bost urte Itzubaltzetako Gazte Asanbladak, eta urtero urtero ekimenen bat edo bestez lagunduta eutsi egin dio herrian San Juan sua izateari eta Prometeoren oparia baliatzeari.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun