Urko Izagirre "Bosnio" euskal preso politiko ohia goizaldeko 1:30ean iritsi da Algortara. Eta gau giroan harrera beroa (mp3) egin diote Amnistia tabernan zain zituen ehun bat lagun inguruk. Lau autotan joan ziren etxekoak eta lagunak Soto del Realera (Madril, Espainia) berarekin biltzeko. Bertara iritsi aurretik horietako bik Guardia Zibilaren kontrola pasatu behar izan zuten, Uribe Kostako Amnistiaren Aldeko Mugimenduak Etengabe bitakoraren bitartez jakinarazi duenez. Gero, Izagirre 20:45ean kaleratu zenean, segituan Euskal Herriko bidea hartu eta Boceguillasen geldialdi bat egin ondoren, 1:30ean iritsi ziren Algortan. Argazkia: cc-by-sa Etete20. Argazki gehiago ikusteko sakatu hemen.
Algortan ehun bat lagun zituen zain. Lagunak agurtu eta guztien pozaren artean harrerari hasiera emateko loreak eskaini zizkioten bertan zeuden eta bertan ez zeuden guztien izenean. Agurreko dantzaren ostean, Galder Bilbao "Txapi"-k bertso pare bat kantatu zizkion. Gero, Amnistiaren Aldeko Mugimenduaren kide batek hartu zuen hitza: pozarekin batera barruan daudenak gogoratu eta aurrera egiteko gauden momentu honetan guztiak etxera ekarri arte borrokan jarraitzeko aldarria egin zuen. Urko Izagirrek ere hitza hartu zuen: borrokatzea merezi duela esan zuen, eta presoen eta beraien familiarren borroka nabarmendu zuen, eta guztiei eskerrak emanez amaitu zuen. Brindisa egin zen, Urkok bere argazkia kendu zuen… bera irten dela baina hor herriko beste 21 preso jarraitzen dutela ere agerian utziz, eta lagunen artean bidea eman zion gauari.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun