Getxoko Itsas Asteak azken txanpa izango du asteburu honetan. Bihar bertan, Bizkaia Zubian, “Zirgariak” antzezkizuna ikusteko aukera egongo da eta ondokoak eskaintzen jarraituko dute: zubi esekiko pasabiderako sarreraren prezio murriztuak, bisita turistikoak, antzeztutako bisitak eta antzinako argazkien erakusketa. Kosta Monumentalean, Areetako Txurruka moilan, bihar ere, kometen jaialdia egongo da eta, igandean, patinatzaileen kontzentrazioa. Asteburuan zehar tren turistikoa, garaiko azoka, bisita turistikoak, antzinako argazkien erakusketa, “Taxi Tour”-en bisita gidatuak, Getxoko Etxe Handien pasealekua eta aisialdi eta kirol tailerrak izango dira Algortako Ereaga hondartzan.
Jarduera ugari
Kirol Portuan, berriz, “Kraken. Munduko txibiarik handiena” izeneko erakusketa zabalik dago eta, ekitaldi horren barruan, bihar, larunbatarekin, 12:00etan, “Enigmas de la ciencia. El calamar gigante” izeneko hitzaldia eskainiko du Angel Guerra doktoreak. Agertoki horretan bertan, Urpeko Astea, Estatuko Itsas Akuariozaleen Topaketa, “Oceanos” pelikularen maratoia, itsas waterpolo lehiaketa, belaontzien estropadak, bela arinari buruzko ikastaroak, irteerak belaontzietan eta “Saltillo” eskola-ontzia ikusteko aukera egongo dira. Halere, bihar bertan, 12:00etatik 15:00ak arte, 1.000 anoa solidario dastagai jarriko dituzte, bakoitza 2 eurotan. Jasotako diru guztia Atfal Sahararen aldeko Getxoko elkartearentzat izango da. Bestalde, Portu Zaharrean, itsasontzi klasikoen kontzentrazioaz gain, Itsas Azoka eta sardina jana bi egongo dira: bata, larunbat arratsaldean eta, bestea, igande goizean. Bisita turistikoak eta bisita antzeztutakoak ere ez dira faltako.
Asteburu honetan zehar, 27 itsasontzi klasiko erakutsiko dituzte Algortako Portu Zaharrean, pertsona ororen gozamenerako. Getxoko Itsas Astearen egitarauaren barruko ekimena da. Itxas Egurra Haizean antzinako itsasontziak berreskuratu eta zaintzeko diharduen elkarte getxoztarrak antolatuta, XX. mendearen hasierako itsasontziak ikusteko aukera emango du erakusketak, orduan belaz edo arraunez nabigatzen zirenak. Ontzi gehienak tamaina txiki edo ertainekoak dira, Getxotik 10 datoz, baina badira Portugalete, Santurtzi, Plentzia, Sokoa, Donibane Lohitzune, Baiona, Lekeitio, Ondarroa, Zumaia eta Donostiatik ekarritakoak ere. Haietariko batzuk orduko itsasontziak dira, baina beste batzuk antzinako moduan egindako berriak dira. Itsasontzi bakoitzak fitxa bat izango du ikusgai bere ezaugarriekin eta itsasontzi zaharren argazki erakusketa ere egongo da. Halere, asteburuan zehar, itsasontzi horiek Portu Zaharra eta Portugalete artean nabigatzea aurreikusi dute Udalekoek. Argazkian, itsasontzi klasikoen aurkezpena Algortako Portu Zaharrean / © Getxo.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun