AC/DCren kontzerturako aparteko metro zerbitzurik egongo denik gezurtatu du LABek
Metro Bilbaoko prentsa-bulegoak hedabideetara zabaldu duen informazioa gezurtatu egin du garraio enpresaren LABen atal sindikalak. "Gaur eguerdian bidalitako prentsa-oharrean dioenez, enpresa eta langileak ados jarri dira ekainaren 29rako deituta dagoen greba orokorrak zerbitzu bereziari eragin ez diezaion. Informazio hori ez da egia. Enpresa Batzordeak ez du horri buruzko inolako berririk jaso, ez eta atal sindikalok ere", azaldu dute langile erakunde abertzaletik. Jakinarazi dutenez, enpresako zuzendaritzak astelehenean, ekainak 28, goizeko hamarretan jarri die hitzordua sindikatuei, greba-egunerako gutxieneko zerbitzuak negoziatzeko. Bitartean, LAB Metro Bilbaok argi utzi nahi izan die metropoliko trenaren erabiltzaileei, hilaren 29an, Eusko Jaurlaritzak ezarritako gutxieneko zerbitzuak soilik egingo direla eta, beraz, ezin dela bermatu AC/DCren kontzerturako aparteko zerbitzurik egingo denik.
LAB Metro Bilbaok "ez legezkoa" deritzogu legezko ekainaren 29rako deitutako greba orokorraren barruan ezohiko zerbitzurik egiteari. Gainera, Metro Bilbao enpresako zuzendaritza eta bitarteko agintedunak "zikin jokatzen ari direla" salatu du sindikatuak, "telefono-deien bidez, bilera informalen bidez, langileak kikiltzen saiatzen ari direlako, grebarekin bat egin ez dezaten presionatuz eta halako zerbitzu bereziak egitera behartuz". "Neurri hertsatzaileak batez ere enpresan denbora gutxien daramatenengana edo oraindik kontratu finkorik ez dutenengana bideratzen ari dira", gaineratu dutenez. Bestela ere, gaur, ekainak 25, Enpresa Batzordearen gehiengoak greba orokorrerako deialdiarekin bat egitea erabaki du LAB, ELA, ESK, CCOO eta CIMen baiezko botoekin (14 ordezkari), UGTko hiru ordezkarien ezezkoen aldean. Emaitza horren aurrean, LAB Metro Bilbaok ekainaren 29rako deituta dauden greba eta mobilizazioetan parte hartzera animatu ditu metroko langileak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun