Udalerrian aurrekontu handien duten elkarteak kirolezkoak dira, horiek jasotzen baitituzte udal dirulaguntzarik potoloenak. Gainera, iaz Portu Zaharrean txosna gabe utzitako kolektiboek adierazi bezala, kirol elkarteak "Udalarentzat izaten ohi dira ez problematikoak".
Uztailaren 2an esleituko diren txosnak honako hauek izango dira: Algortako San Inazioetan lau txosna handi, bi talde txosnako, eta beste txosna bat, alkoholik gabekoa, talde batentzat. Itzubaltzeta / Romon bost txosna txiki, talde bana txosnako edo bi txosna handi, bina talde txosnako. Azkenean, Portu Zaharrean lau txosna handi izango dira, bina talde txosnako. Txosna handiak 9 x 4 metrokoak izango beharko direla eta txikiak 6 x 4 metrokoak ezarri dute.
Zigor eta debekuak
Getxoko Udalak adierazi duenez, "txosnetan ezin izango dira iragarri oinarrizko eskubideen edozein urratzea dakarten egintzak, pertsona guztien eskubideak eta askatasunak errespetatzeari buruzkoak direnean. Honako kartel edota ikurrak ere ezin izango dira erabili: pertsonen duintasunaren aurka doazenak eta terrorismoaren alde daudenak, horiekin jaietako ekintzen bizikidetza eta normaltasuna arriskuan jartzen dituztenak". Horrelakoren bat gertatuz gero, azaldu dutenez "3 urtez txosna ez instalatzeko edo erabiltzeko zigorra jasoko da. Baita osagarriak diren isuna eta beste neurriak ere". Izan ere, horrelako eskaera egin zuen bere garaian PPk eta Udalbatzan berari batu zitzaizkion EAJ eta PSE-EE, Eudelen aurreko testua adostu ondoren. Bilboko Udalak azken boladan Kaskagorri eta Txori Barrote konpartsei ezarritako debekua baino gogorragoa da Getxon jasoko liratekeen zigorrak.
Bestalde, "ez dira onartuko ere Udalbatzak onetsi dituen Planen aurka doazen egintzak: Berdintasun, Gazte, Drogomenpekotasun, Immigrazio planak... Ezta animaliei tratu txarrak ematea dakarten egintzak ere", gaineratu dute udalekoek.
Etzidamura arteko epea dago Itzubaltzetan, Algortan eta Portu Zaharrean txosnak eskatzeko
Getxoko Udalak San Inazio, Itzubaltzeta / Romo eta Portu Zaharreko jaietan txosnak jartzeko dekretua (pdf) kaleratu berri du. Pasa den ostegunean jakinarazi zuen aipatu deialdia eta ostiral honetan baino lehen, hots, ostegunean askoz jota amaituko da txosnak eskatzeko aukera. Eskaerako paper guztiak egiteko zortzi eguneko epea eman die, hortaz, kirol eta kultur elkarteei Getxoko Udalak. Bitartean, dekretuaren inguruko informazioa ezin da udal webgunean irakurri, estekak ez dabiltzalako. Udal dekretuak hainbat baldintza ezartzen du txosnaren bat eskuratu ahal izateko, tartean Udalaren hainbat plangintza kritikatzeko debekua edota Eudelek eta Getxoko Udalbatzak ETAren biktimak ez gogaitzearen aitzakiapean zabaldutako debeku berriak. Gainera, elkarteek frogatu beharko dute beren egonkortasuna eta kaudimena, baita urtean zehar udalerrian egiten dituzten jarduerak ere. Elkarteek beren kultur, kirol eta gizarte-jarduera urte natural guztian zehar garatu behar dituzte eta hura egiaztatu, azaldu dute udalekoek. Argazkian, Algortako San Inazioetan jarritako txosna ilegal bat, 2006an.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun