Euskal gehiengo sindikala "oso pozik" agertu da gaurko greba orokorrak izan duen "oihartzun handiarekin". Eusko Jaurlaritzaren arabera, ordea, sektore pribatuan %25eko jarraipena izan du eta %5ekoa Administrazioan. ELA, LAB, ESK, EILAS, HIRU eta EHNE sindikatuek plazaratutako ohar bateratuan adierazi dutenez, "greba egin duen enpresa kopurua eta lanuztea zenbatekoa izan den kontutan izanik, greba orokorrak arrakasta izan du sektore honetan". Denda txikietan eta ostalaritzan ere grebaren jarraipena "aski zabala" izan da, gaineratu dutenez. Toki-administrazioari dagokionez, besteak beste, Erandio eta Leioako udal langileek grebari emandako "babes handia" nabarmendu dute sindikatuek. Bestalde, Erandioko Loramendi adinekoen egoitzan gutxieneko zerbitzuak besterik ez direla izan esan dute. Horrelako zentroetan "aurrez egindako batzarretan bozketak lanuztearen aldekoak izan ziren, eta gaur hala ikusi da", nabarmendu dutenez.
Irakaskuntza eta garraioak
Irakaskuntzan, ikastetxe publikoetan, ikastoletan eta gizarte-ekimeneko eskoletan ikasturtea amaituta dago, baina euskal gehiengo sindikalak nabarmendu duenez, "sektoreko langile askok eta askok hartu du parte lau hiriburuetako mobilizazioetan". Bestalde, EHUn lanuzteak "erantzun handia" izan du; "ia eskaini den zerbitzu bakarra, azterketetarako gutxieneko zerbitzua izan dela". Haur eskoletan ere lanuztea oso handia izan omen da, "langileen %80 inguruk jarraitu baitute". Garraioen sektorean gutxieneko zerbitzuak bete dira. Besteak beste, Metro Bilbao enpresak lanuztearen jarraipena handia izan da, ELA, LAB, ESK, EILAS, HIRU eta EHNE sindikatuek adierazi dutenez.
Uribe Kostako industria arloan grebaren jarraipena "oso ona" izan dela dio LABek
LAB sindikatuko Eskumaldeko arduradunek adierazi dutenez, Uribe Kostako eskualdeko industria arloan "oso ona" izan da gaurko deitutako greba orokorrak izandako jarraipena. Lan erakunde abertzalearen arabera, Alconza Berangon jarraipena %77koa izan da. Bitartean, Lamiakoko Vicrila enpresan, langileen %50ak egin du greba goizeko txandan, eta jardunaldi erdibituan daudenen %90ak jarraitu du deialdia. Erandioko AGRA enpresa, berriz, geldirik egon da DHL eta SMA (lehen Matrinor zena) bezala. Horietan, "langileen %100ak bat egin du grebarekin", Eskumaldeko LABen arabera. Hala ere, herrietan saltokietako eta tabernetako langile gutxik greba egin dutela nabarmendu dute sindikatu abertzalekoek. Argazkian, eskualdeko enpresa bat ertzainek zainduta / © Koska irratia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun