Zazpigarren urtez jarraian, “Hondartza Denontzat” programa jarri du abian Bizkaiko Foru Aldundiaren Ingurumen Sailak. Bidaideak elkarteak eta Heldu federazioak sustatuta, "herritar guztiei hondartzaz gozatzeko aukera ematea eta ezintasuna edo mugikortasun urria dutenei eskubide hori bermatzea" da ekimenaren helburua, foru iturriek zehaztu dutenez. Horretarako, Bilbao Bizkaia Kutxaren zein Getxo, Plentzia, Lekeitio, Muskiz, Zierbena eta Ibarrangeluko udalen laguntza dute. Egitasmoa abuztuaren 31ra arte egongo da indarrean, asteko egun guztietan, etenik gabe, 11:00etatik 18:30era, Ereaga (Algorta), Plentzia, Isuntza (Lekeitio), La Arena (Muskiz / Zierbena) eta Laida (Ibarrangelu) hondartzetan. Aldundiaren arabera, "kokapena, irisgarritasuna eta demografia izan dira arrazoiak hondartza horiek aukeratzeko zerbitzu hau emateko orduan". Edizio honetan, 4.500 bat pertsonari eman ahal izango zaie laguntza: nagusiki, ezintasuna duten pertsonak eta adinekoak izango dira. Hori dela eta, hareatzetan erabiltzeko berezia den ekipamendu tekniko oso bat jarriko da kolektibo horien eskura, baita programa behar bezala gauzatzen dela ziurtatzeko behar diren azpiegiturak eta laguntza pertsonalerako zerbitzuak ere. Argazkian, lagun bat begiraleek lagunduta, bainua hartu ostean / Bidaideak.
"Hondartza Denontzat" programak 2010ean eskaintzen dituen baliabide materialen eta giza baliabideen artean, honakoak nabarmendu daitezke: laguntza teknikoak hareatzetan mugitu ahal izateko eta bainua hartu ahal izateko; aldagela bereziak; laguntza pertsonala aldageletarako, hondartzen barruan ibiltzeko eta bainua hartzeko; eta azkenik, garraio egokitua. Laguntza pertsonala emateko, 21 begirale espezializatu egongo dira; programa honetarako berariaz kontratatu dira. Horrez gainera, talde horrek Espainiako INEM erakundearen “mugitzeko laguntzaile pertsonalak” trebatzeko enplegu tailerreko kideen laguntza izango du, zerbitzua indartzeko. Hori osatzeko, Bidaideak elkarteak garraio-zerbitzu berezi bat koordinatuko du. Partikularrek zein adinekoei eta ezintasuna dutenei laguntzeko elkarte edo erakundeek eskatu ahal izango dute zerbitzu hori, koordinazio-puntuan bertan. Bestalde, azpimarratu behar da hondartza bakoitzean, hareatzaren barruan, informazio-puntu bat egongo dela. Handik dinamizatuko da zerbitzua. Puntu horretan eskatu ahal izango dira laguntza teknikoa eta laguntza pertsonala.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun