Udalbiltzaren aurkako epaiketa uztailaren 15ean hasiko da Madrilen. Auzipetuei elkartasuna adierazteko eta nazio instituzioaren "zilegitasuna eta beharra" aldarrikatzeko herriz herri Bai Udalbiltzari babes taldeak sortu dira eta udaletan mozioak aurkezten ari dira. Getxon ere babes taldea martxan dago eta bertan parte hartzen ari dira Eusko Alkartasuna, Aralar, Ezker Abertzalea eta Alternatiba. Besteak beste, sinadurak batzen hasi dira elkarte (pdf) eta norbanakoen (pdf) artean. Nahiz eta Getxoko EAJk joan den astean aurkeztutako mozioa ez babestu, ondokoa jasotzen da izenpetzeko idatzian: "1999ko azaroko osoko bilkuran Getxoko Udalak bere egin zituen Udalbiltzaren helburuak, egitasmoak eta izatea, eta bertako kide izateko borondatea adierazi zuen". Jelkideek ere baiezkoa eman zioten horri.
Mozioari dagokionez, eskaera zehatzak hauexek izan dira:
1. Aldarrikatzea 1999ko irailean Euskalduna jauregian egindako batzar sortzailean onartu ziren bost helburuen alde lan egitea beharrezkoa eta zilegi dela eta ezin dela delitutzat jo. Helburu eta lan-ildo horietan aurrera egiteagatik hautetsi eta alkateak kriminalizatzea demokraziaren aurkako ekimena da, are gehiago kontuan hartuta epaituak sufragio unibertsalez aukeratutako herri-ordezkariak direla.
2. Konpromisoa hartzea, edozein arlo instituzionaletan, demokratikoki aukeratutako ordezkariek Euskal Herriko lurralde eta eremu administratibo guztietako instituzioak sortu, bultzatu, garatu eta finantzatzeko duten eskubidea errespetatzeko.
3. Udalbiltza eta bertako hautetsi eta langile ohien aurka Madrileko Auzitegi Nazionalean eramaten ari den auzibidea irmoki salatzea eta Estatuko Gobernuari eskatzea Estatuko fiskal nagusiak gaur egun mantentzen duen akusazio publikoa erretira dezala.
Plentzian, berriz, Udalbiltzaren aldeko bideoa egin dute:
Eusko Alkartasuna, Aralar, Ezker Abertzalea eta Alternatibaren izenean, Getxoko Udalbatzarrean ordezkaritza legala duen azken horrek Udalbiltzaren epaiketaren kontrako mozioa aurkeztu zuen, joan den ostiraleko (ekainak 25) osoko bilkuran. Eskaerak Eusko Legebiltzarrean 2008ko abenduan onetsitakoen berdinak izan arren, Getxoko EAJ abstenitu egin zen bozketan. "Apartheid politikoaren Udalbatzarrean gehiengo osoa duten PPk eta PSE-EEk aurka bozkatu zutenez mozioa onesterik ez bazegoen ere, Imanol Landa alkate jelkidearen eta bere taldekideen abstentzioak argi irudikatu du eskubide zibil eta politikoekin, demokraziarekin eta Euskal Herriaren nazio eskubideekin EAJk duen konpromiso eza", tokiko ezker abertzaleak salatu duenez. Hala ere, ekimenekin jarraituko du Getxo udalerriko Bai Udalbiltzari Babes Taldeak. Bihar bertan, sinadurak batzeko mahaia jarriko dute, 11:30etik aurrera, Algortako Telletxe plazan. Bitartean, Sopelan, San Pedro jaietan murgilduta onartu zuten, hilaren 24ko udal batzarrean, Udalbiltzaren aldeko adierazpena. Getxon ez bezala, udal sopeloztarrean, EAJk ere eman zion babesa Ezker Abertzaleak aurkeztutako mozioari; baita EAk, Berdeek, eta Alternatibak ere. PSE-EEk eta PPk, aldiz, ezetza bozkatu zuten. Argazkian, Udalbiltzaren alde Sopelan egindako elkarretaratzea / © Sopela.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun