Douglasek, bere taldeak zuzentzeaz gain, gaur egun musika-harreman garrantzitsuak ditu musikari handiekin, esaterako honako artista hauekin: Anthony Braxton, Don Byron, Joe Lovano, Miguel Zenon, Uri Caine, Bill Frisell, Cibo Matto, Mark Dresser, Han Bennink eta Misha Mengelberg. Douglasen proiektu ezagun eta iraunkorrenetakoa dugu bere boskotea, eta taldean aldaketa txikiren bat egin den arren, zazpi urtez baino gehiagoz jardun. Taldeak konposizio originalen errepertorio luzea du, eta jazz garaikideko pieza sorta zabala eta estilo adierazgarri eta grinatsua bateratzen ditu. Gaur egun, honako musikari hauek jarduten dira tronpeta-jolearekin: Donny McCaslin (saxo tenorra), Uri Caine (pianoa), James Genus (kontrabaxua) eta Clarence Penn (bateria).
Jam session-ak
Hamaikagarrenez, Getxoko Jazzaldian jam sessions-ak izango dira, Algortako The Piper's taberna irlandarrean, Biotz Alai plazako kontzertuak bukatutakoan. Gauerdia aldera, publikoak jazz onenaz gozatzen jarraitu ahal izango du, giro apartan eta lasaian. Saioetan oinarrizko talde bi izango dira, eta, horiei, egunero artista berriak gehituko zaizkie, batzuk jaialdiko parte-hartzaileak eta erritmo guztiz desberdin eta originalak eskainiko dituztenak. Bitartean, Broken Brothers Brass Band taldea arituko da Algortako kaleak girotzen. Azkenik, Algortako Satistegi kafetegian Fernando Barcenaren argazkilariaren erakusketa egongo da ikusgai.
Dave Douglas, bere belaunaldiko tronpeta-jotzaile eta konpositore ezagunenetariko bat eta "free jazz" eta inprobisazioaren erakusgarria, biharko protagonista nagusia izango da Getxoko Jazzaldian. Musikari amerikarra bere boskotearekin jardungo da Algortako Biotz Alai plazan, 10:00etan. Aurretik, ordubete lehenago, GDJazz Quartet banda galiziarra arituko da Talde Lehiaketan. Hirugarren Milurtekoa atalean (Algortako Telletxe plazan, 19:00etan), berriz, MIT4SPIEL5 talde alemana izango da. Azkenik, ohi bezala, Algortako The Piper’s taberna irlandarrean jam session bat izango da Dave Douglasen saioa amaitu eta gero. Dave Douglasek 1993an hasi zuen bakarkako ibilbidea, “Parallel Worlds” diskoarekin, eta ordutik hogeita hamar bat grabazio egin ditu. 2005ean, kritikak goretsitako zazpi album jarraian kaleratu ostean, estatubatuarrak bere etxe diskografikoa sortu zuen, Greenleaf Music, hain zuzen ere. 1980 urtearen erdialdetik New Yorken bizi da, eta bertatik nazioan barne eta nazioartean ospea lortu du. Argazkian, Dave Douglas / © Getxoko Kultur Etxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun