Amnistiaren Aldeko Mugimenduaren oharra:
Ainhoa Orozi 60 euroko epaia jarri dio Espainiako Entzutegi Nazionalak
Ezpala tabernako zerbitzariari urtebeteko espetxe zigorra eskatu zion fiskalak terrosrismoa goratzea egotzita.
Ainhoa Orozi 60 euroko zigorra ezarri dio Espainiako Entzutegi Nazionalak:
Ezpala tabernako zerbitzaria orain dela zenbait aste epaitu zuten Espainiako Entzutegi Nazionalean, presoen argazkiak tabernan izatearen ondorioz terrorismoa goratzea egotzita. Fiskalak urtebeteko espetxe zigorra eta zortzi hilabeteko inhabilitazioa eskatu zituen berarentzat. Azkenean, epaileak 60 euroko zigorra ezarri dio desobedientzia egotzita.
Euskal preso politikoen argazkiak izatea egotzita lehen epaiketa izan da Ainhoa Orozena, eta epaiak erakusten du beraien zurrunbilo errepresiboak galduak daudela, aterabiderik gabe. Ezpala taberna jomugan jarri zuten, bai mediatikoki, bai polizialki, bai judizialki. Pertsona bat Espainiako Entzutegi Nazionalean izan da deklaratzen eta azkenean dena 60 euroko isun batekin amaitu da. Argi dugu ez direla epaiketa guztiak honela amaituko, eta presoekiko elkartasuna zigortzen jarraituko dutela. Baina kasu honetan gertatu denak errepresioaren nora eza erakusten digu ezbairik gabe.
Argazkien aitzakian euskal presoekiko elkartasuna zigortu nahi dute. Egunotan Aresek berak aurkezturiko brigada berriak aurreratu digu eraso errepresibo andana izango dela uda honetan ere, argazkien eta pankarten aitzakian jai guneak okupatuz eta herritarren aurka eginez.
Amnistiaren Aldeko Mugimenduak errepresioaren aurka eta euskal preso politikoen defentsan aritzeko deia egiten dugu.
"Terrorismoa goratzea" leporatuta, Iruñeko Ezpala tabernako zerbitzaria epaitu zuten orain dela aste batzuk Espainiako Auzitegi Nazionalean. Euskal Preso Politikoen Kolektiboko kide batzuen argazkiak izateagatik urtebeteko espetxe zigorra eta beste zortzi urteko inhabilitazioa eskatu zituen fiskalak. AAMk gaur jakinarazi duenez, Auzitegi Nazionalak berriki kaleratu du auziari buruzko epaia eta bertan ostalariari 60 euroko isuna jarri dio, poliziei desobedientzia egiteagatik, argazkiak ez kentzean. Horren aurrean, "kasu honetan gertatu denak errepresioaren nora eza erakusten digu ezbairik gabe" baloratu du errepresioaren aurkako mugimenduak. Dena den, zuhur dabiltza aurrekaria den epaiari buruz. "Argi dugu ez direla epaiketa guztiak honela amaituko", adierazi dutenez. Era berean, "errepresioaren aurka eta euskal preso politikoen defentsan aritzeko deia" luzatu dute. Bitartean, hilaren 13an jarriko da martxan Rodolfo Ares Herrizaingo sailburuak iragarritako Ertzaintzaren brigada berezia. Argazkian, hainbat ertzain Jon Anzari buruzko pankarta bat kentzen Berangon pasa den ekainaren 6an / cc-pd irakurle batek bidalia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun