Atfal Sahararen aldeko Getxoko elkarteari 16.278 euroko laguntza ematea onartu berri du Getxoko Udalak, Oporrak Bakean 2010 programa aurrera eramateko. Oporrak Bakean ekimenaren bitartez, udako hilabeteetan neska-mutil sahararrak etxean hartzen dituzte familiek. Oraingo edizioan Araba, Bizkaia eta Gipuzkoako 60 udalerritara 450 ume heltzea espero dute. Getxo udalerriari dagokionez, aurten, 7 eta 12 urte bitarteko 13 haur (8 mutil eta 5 neska) iritsiko dira, uztailaren 8tik 10era bitartean, ziurrenera. Bestalde, Imanol Landa alkateak ekainaren azken astean egindako Getxo Sea Week ekimenean bildutako dirua eman dio gaur Julio San Roman Atfal elkarteko ordezkariari. Txekearen balioa 1.715 eurokoa da, Algortan txibierroak (75 kilogramo) eta sardinak (1.080 kilogramo) saltzen ateratako etekina, alegia. Diru hori saharar errefuxiatuen kanpamenduetara bidaltzeko izango da. Argazkian, San Roman eta Landa txekea eskuan / © Getxo.net.
Udalak emandako diru-laguntzaren bitartez, saharar errefuxiatuen kanpamenduetatik Getxorako joan-etorriak ordainduko dituzte, baita bi hilabeteetan aurrera eramango dituzten jarduerak ere. Hala nola, txangoak, haurrentzako ekipamenduak (igerilekurako txanoak, txankletak, bainujantziak…), harrera jaia, saharar eta euskal begirale bana, eta psikologo baten zerbitzua. Saharako umeei uda giro lasaiagoan emateko aukera eskaintzen die Oporrak Bakean ekimenak, basamortuko tenperatura altuetatik urrun eta jaki eta osasun zainketa egokiagoarekin. Aldi berean, oso esperientzia aberasgarria bizitzearekin batera, beste errealitate bat ezagutzeko parada ere eskaintzen die harrerako familia getxoztarrei programak, urtez urte parte hartzaileek agertzen dutenaren arabera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun