Beste alde batetik, talde gazteek garrantzi handiko lekua izan dute aurten ere Algortan. Talde Lehiaketa horren erakusle izan da. Aurtengo ekitaldian, Finlandiako, Italiako, Galiziako eta Poloniako bandak iritsi dira finalera. Maila handia erakutsi ondoren, Wierba & Schmidt Quintet talde poloniarra nagusitu zen lehiaketan. Azken urteotan, boskotea bere herriko jazz-eszenan nabarmendu da, nahiz eta bere kideak oso gazteak izan. Bestalde, Galiziako GDJazz Quartet-ek bigarren saria eskuratu zuen. Azkenik, lehiaketa irabazi duen taldeko tronpeta-joleak, Piotr Schmidtek, bakarlaririk onenaren saria ere irabazi du
Hirugarren Milurtekoa atalean ere eskaintza anitza izan da aurten. Bost egunetan zehar, Algortako Telletxe plazak beste horrenbeste kontzertu hartu ditu. Horietan jatorri anitzeko taldeak aritu dira. Batetik, Old Bilbao Tradicional Jazz Band, Leioa Big Band eta Mikel Bikandi Quartet taldeek Euskadin eginiko jazza erakutsi zuten; bestetik, Mit4Spiel5-k eta Gianni Gagliardi Triok beste herrietako doinuak jo zituzten.
Bestelako jarduerak
Ohi bezala, kontzertu nagusiak amaitu eta gero, jam session-ak izan dira Algortako The Piper's taberna irlandarrean. Bertan, zenbait talde aritu dira, jazzaldian parte hartu duten hainbat musikarik lagunduta, musika inprobisatua eskaintzen. Halaber, kaleetan ere egon da jazza Broken Brothers Brass Band taldeari esker. "Marchin banda"-k hainbat desfile egin ditu bost egunetan zehar eta Getxoko eta Bilboko kaleak alaitu ditu dixie erritmoez. Azkenik, Satistegi kafean Fernando Barcena argazkilariaren erakusketa egon da, eta bertan, artista handien irudiak ikusteko aukera izan dute bisitariek.
Ikusi iazko Getxoko Nazioarteko Jaialdiko laburpena eta aurtengo kontzertu guztien irudiak (© Getxoko Kultur Etxea):
Musikaz beteriko bost egunen ondoren, Getxoko Jazzaldiak atzo eman zion amaiera bere 34. edizioari. Uztailaren 1etik 5era, 12.000 bat lagunek gozatu dute izan diren kontzertu, jam session eta ekitaldi ezberdinekin, Getxoko Kultur Etxeak adierazi duenez. "Aurten ere, kalitatea eta aniztasuna izan dira jarduera horren ardatz nagusiak. Halaber, talde gazteen aldeko apustuari eutsi dio jaialdiak", azaldu dutenez. Horrela, musikari ospetsuak ez ezik, Talde Lehiaketako eta Hirugarren Milurtekoa ataleko banda gazteak ere aritu dira Getxon. Aurten, era askotako taldeak eta estiloak izan dira kontzertu nagusietan. Publikoak erantzun bikaina eman dio jaialdiaren musika eskaintzari eta kontzertu bikainez gozatu ahal izan du. Lehenengo bi egunetako kontzertuek asebete utzi zuten publikoa bi musika eskaintza originalen eta oso ezberdinen eskutik: batetik, Charles Lloyd eskarmentu handiko saxo-jolearen laukotea eta, bestetik, Jerry Gonzalez eta Fort Apache Band. Bide erdia bete zuen jazzaldiak nazioarteko jazzaren tronpeta-jole ospetsuenetariko baten kontzertuaren eskutik: Dave Douglas, hain zuzen ere. Igandean, Dee Dee Bridgewater abeslaria ia-ia bete zuen Biotz Alai plaza eta gutxigatik ez zuten "sarrerak agortuta" kartela jarri. Saioan bere azken diskoaren zenbait kanta eskaini zuen, Billie Holiday abeslariaren omenez moldatuta. Azkenik, David Sanborn saxo-jolea iparamerikarraren hirukotearen saiorekin amaitu zen jazzaldia bart. Argazkian, Wierba & Schmidt Quintet poloniarrek irabazi dute talde lehiaketa / © Getxoko Kultur Etxea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun