Biktimen senitartekoak gonbidatuta izan diren errekonozimendu ekitaldi hori egitea aho batez adostu zuten udal ordezkapena duten alderdi politiko guztiek eta horrekin, Imanol Landak bere alkate karguaz jabetu zenean hartu zuen konpromisoa beteko du, Getxoko Udal Prentsa Bulegoak nabarmendu duenez.
"Ekitaldiarekin aurrerapauso bat emango dugu udalerri bezala terrorismoaren biktimekiko geneukan zor historikoa garbitzeko", adierazi du Imanol Landak. Alkateak erantzun sozial, instituzional eta politikaren errealitatean oinarritutako autokritika mezua ere igorri nahi du. Izan ere, kasu batzuetan bai, baina beste gehiegitan ez, errealitate hori ez da biktimen familiei bizitzea tokatu zitzaien egoera dramatiko eta larrien mailatara egon. "Handia da, beraz, urte guzti hauetan biktimek eta senideek pilatu duten errekonozimendu defizita. Dudarik gabe gure herriak duen zor historikoa da eta hori ordaintzen joan behar eta nahi dugu" gehitu du Imanol Landak. "Irekitako bideak Gerra Zibilaren eta frankismoaren biktimei eskaini beharreko omenaldiarekin jarraipena eduki beharko du, Udaleko indar politiko guztiek ere adostu dutena" amaitu du alkateak.
Instituzio-ekitaldia
Terrorismoaren biktimen omenezko instituzio-ekitaldia 12etan hasiko da Getxoko Udaletxeko batzar aretoan senideen harrerarekin. Oroimenezko ekitaldi laburraren ondoren, lore eskaintza izango da Julia Irazustabarrenaren Guztion Etxea izeneko eskulturaren ondoan, San Inazio plazan.
Udalbiltzako 22 hautetsi auziperatuei babesa emateko asmoz, Getxoko Bai Udalbiltzari Babes Taldeak elkarretaratzea deitu zuen larunbat honetarako, goizeko 12etan, Algortako Kasino plazan. Egun berean eta ordu berean, baina, "terrorismoaren biktimak" omentzera deitu du gaur Getxoko Udalak. Pasa den ekainaren 25eko Udalbatzan, Udal Gobernua duen EAJk ekimena eta haien arteko distantzia erakutsi zuen, beste leku batzuetan babestu duen testuari abstentzioa emanez. Gaur tokiko erakundeak jakinarazi duenez, udaletxean eta San Inazio plazan egingo den ekitaldi instituzionalean, "Getxon izandako atentatu terroristen ondorioz edo Getxoko auzokideen kontrako atentatuen ondorioz izandako hildakoak" omenduko dituzte. Biktimak 18 dira gaur zabaldutako prentsa oharraren arabera eta 15 "Getxoberri" udal aldizkariari kasu eginez gero. Iaz, ordea, 16 ziren omenaldia jasotzekoak. Dena den, larunbatean hildakoen senideei lore eskaintza egingo die Udalak, Julia Irazustabarrena artistari enkargatutako Guztion Etxea izeneko eskulturaren ondoan. 53.671,20 euro gastatu dute arte lan horretan. Argazkian, Udalbiltzaren alde Algortan egindako elkarretaratze bat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun