Berangon ere Gobela ibaia bideratzeko lanak egitea eskatu dio Uraren Euskal Agentziari tokiko Udalak, etorkizunean uholde arriskua ekiditeko. Horretaz gain, ibilgu eta ibaiertz guztiak garbitzea eskatuko dute. Plan hidrologikoak udalerriak pairatzen dituen arazoak kontuan hartzea nahi dute tokiko erakundean ordezkaritza daukaten alderdi politiko guztiek (EAJ, PP, EA, PSE-EE eta Ezker Batua). "Milagarren aldiz", uztailaren 16an uriolen ondotik egin dute eskaera. Eurite indartsuen ondorioz, Sabino Arana zeharbideko oinezkoentzako pasabidearen alboan gainezka egin zuen Gobelak, bizitegi-guneetako lurrak urez betez eta Sabino Arana Etorbideko eta ondoko kaleetako etxebizitza, industria eta saltokiak mehatxatuz. "Halaber, Gobelako ibaiadarrak diren Bolue eta Itze errekek euren ibilguen ertzak gainditu zituzten, Larrañazubi eta Ugao bideetan etxeak, dendak, garajeak eta plantazioak urpetuz", Ura agentziari igorritako gutunean nabarmendu dutenez. Argazkian, Zubilleta inguruan ere gainezka egin zuen Gobelak.
"Gero eta sarriago gertatzen ari dira uholdeak. Hala ere, Ura agentziak ez du inolako neurririk hartu orain arte. Euskal Autonomi Erkidegoan egin behar diren jarduerak asko direla eta horietarako behar beste baliabiderik ez dagoela argudiatzen dute", salatu dute eskutitzean. Politikariek aho batez adierazi dute "auzokideek bizi duten segurtasun gabeziagatik oso kezkatuta" daudela. Ildo horretan, udalerriko erreken eta ibaiertzen segurtasuna handitzea "lehentasunezkotzat" jo dute. Hori dela eta, Berangon ibaia bideratzeko plana agindu eta idaztea eta, hori, Gobelako Plan Integralean berehala sartzea eskatu dute; baita uholdeak saihesteko premiazko neurriak hartzea ere. Atal horretan "Bolue errekan zein hezegunean Gobelaren hustualdia erraztu eta etengabeko uholdeak saihesteko beharrezko jarduerak zehaztu eta gauzatzeko" eskaera sartu dute. Bestetik, "oztopoak eta ibaiertzetako sastrakak kenduz, beharrezkoa balitz ibilgua dragatuz eta, nahitaez, mantenu lanak eginez", erreka guztiak garbitzeko premia helarazi diote Urari. Guzti hori, "dagozkion ingurumen-parametroak zainduz".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun