Oinezkoentzako bidea hobetu eta erraztu nahian, herri-lanak egiten ibili dira Areetako Urkijo kalean, Andres Larrazabal eta Club karriken arteko zatian. Obrak bukatuta, merkataritzako eta oinezkoentzako beste gune bat izango da aurrerantzean aipatu herriak, Paulino Mendibil eta Andres Larrazabal kaleak kontuan hartuta. Kale osoak dituen 113 metrotatik 40 metro luzerako (213 metro koadroko azalera) tartea zaharberritu dute, oinezkoentzako baldintzak hobetzeaz gain, inguruko auzokide eta erabiltzaileen joan-etorriak ahalbidetzeko. Imanol Landa Getxoko alkateak adierazi duenez, “alde batetik, lanek merkataritzako alorra berpizteko Udal Planaren gomendioei jarraitu diete, Andres Larrazabal-Paulino Mendibil-Urkijoko oinezkoentzako gunean merkatalgune ibilbideak osatzeko. Bestetik, udalerriko beste leku batzuetan egin den legez, herritarrentzat eta auzotarrentzat aisialdirako eta elkartzeko toki gehiago egokitu nahi izan dira“. Argazkian, Areetako Urkijo kalea zaharberrituta / © Getxo.net.
Andres Larrazabal eta Iturrigorri arteko zatian, gorri eta gris koloreko zoladura jarri dute eta, bertatik, oinezkoak ibili ahal izango dira bakarrik. Horregatik, aparkalekuak, espaloi estuak eta ibilgailuen bide bakarra kendu egin dira, nahiz eta garajeetako sarrera-irteerak egin ahal izango diren. Kale erdian argiak, "berri-berriak", eta eserlekuak ere jarri dituzte. Era berean, kale tarte horretan dauden tabernek kanpoan terrazak ipintzeko aukera izango dute. Urkijo kaleko bigarren zati batean, Iturrigorri eta Club kaleen arteko zatian, hain zuzen, bitariko gunea egokitu dute, “plataforma bakarra” osatuz; bai oinezkoentzako, bai aparkatzeko eta zamalanak egiteko. Lan horien aurrekontua 118.000 eurokoa izan da.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun