Larunbat honetan, uztailak 10, Udalbiltzako auzipetuei babesa emateko ekitaldia egingo dute Algortan. Hitzordua eguerdiko 12etatik 14:00etara jarri du, Kasino plazan, Getxoko Bai Udalbiltzari Babes Taldeak. Bitartean atzo, osteguna, uztailaren 15etik aurrera Espainiako Auzitegi Nazionalean epaituko dituzten 22 lagunetatik batek, Lander Etxebarriak, eskaini zuen hitzaldia (mp3) Algortako Aldai patronatuan. Horri hitza eman baino lehen, Christian Reinicke hautetsi independentista algortarrak egin zituen aurkezpen lanak. Azkenik, hilaren 17an Bilbon egingo duten nazio manifestazioan parte hartzera deitu ditu herritarrak Getxoko Bai Udalbiltzari Babes Taldeak. “Udalbiltza aske! Bai Udalbiltzari, Bai Euskal Herriari!” lelopean, 17:30ean abiatuko da martxa Casillatik. Argazkian, Lander Etxebarria atzoko solasaldian.
Zazpi urte pasa ondoren, uztailaren 15ean 22 lagun epaituko dituzte Madrilen, tartean hainbat herritako alkate eta zinegotzi, "erakunde terroristako kide izatearen balizko delitua" leporatuta. Auzigai dituzten eginkizunak, baina, Udalbiltzako Batzorde Eragileko kide nahiz langile gisa burututakoak dira. Fiskalak auziperatu bakoitzarentzat 10 urteko espetxe zigorra eskatzen du, 10 urtetan lan edo kargu publiko bat betetzeko debekua eta kostak ordaintzea, ustez erakunde terroristako partaide izategatik. Gainera, lau auzipeturentzat, 5 urteko espetxe zigor gehitua, 12 urtetako erabateko inhabilitazioa eta kostak ordaintzea eskatzen du fiskalak, fondo publikoen erabilpen bidegabea ere egotzita. Bestalde, Dignidad y Justicia delako elkarte ultraeskuindarrak, akusazio partikular gisa, auziperatu bakoitzarentzat 14 urteko espetxe zigorra, 20 urtetako erabateko inhabilitazioa eta kostak ordaintzea eskatzen ditu. Diru publikoaren erabilpen bidegabea egotzitakoei, berriz, 8 urte gehiagoko espetxe zigorra, 20 urtetako erabateko inhabilitazioa eta kostak ordaintzea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun