Areetako estropada eta emakumeen liga jokatuko dira bihar eta etzi Ibaizabalen
Kantabrikoko Arraun Elkarteak eta Areetako Raspas arraun taldeak antolatuta, Areetako estropada burutuko da bihar, larunbatean, 12:00etan, Ibaizabal itsasadarrean. Areetako kaiaren lehorretik itsasora jauzi egingo dute bihar KAEren 2. mailan dauden hamaika taldeak, 3 itsas-miliak edo 5.556 metroak denborarik laburrenean egiteko xedearekin. Hiru estropaden ostean azken postuetan kokatu diren Erandioko Lutxana Arraun Elkartea eta Areetako bertako Raspas taldea lehenengo txandan irtengo dira. Beste 14 talderen artean aipagarria da buruan dauden, eta bihar laugarren txandan irtengo diren Getaria, Ondarroa, Portugalete eta Zumaiaren artean oraingoz lau puntuko aldea baino ez dagoela eta, beraz, garrantzitsuak izango direla bihar metatuko ditzuten puntuak. Banderaz gain, 9.000 euro banatuko dituzte sarietan. Bestalde, etzi, igandean, 11:30ean Euskotren Emakumeen Arraun Ligako Kaiku bandera jokatuko da Ibaizabalen uretan, baina kasu horretan Portugaleten antolatuta. Argazkian, Raspas taldea 2008an / © Deustu Arraun Taldea.
Euskotren ligan lau dira lehiatzen diren emakume taldeak: Bizkaia, Gipuzkoa, Kantabria eta Galiziako selekzioak. Ligan zortzi estropada izango dira, haietako lehena bihar jokatuko dela Kantabriako Pedreñan. Hortaz, bigarrena izango da igandean Ibaizabalen jokatzekoa. Dena den ez da hori izango Uribe Kostako kostaldea hartuko duen emakumeen estropada bakarra, uztailaren 31n, San Inazio egunean, bosgarren proba izango baita Algortako Portu Zaharrean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun