Astelehenean, uztailak 12, abiatuko da Euskal Herriko Unibertsitateak (EHU) 2010-11 ikasturtean ematen hasiko den gradu ikasketa berrietarako izena emateko epea. Graduko ikasleek matrikulatzeko izango duten prozedura nabarmen aldatu da, aurten unibertsitaterako sarbide probak ere aldatu direlako, EHUko iturriek azpimarratu dutenez. Selektibitate berri hori lehendabizi egin zen pasa den ekainean, ohiko deialdian, eta ezohiko deialdia atzo bukatu zen. 2010-11 ikasturterako ez da noten araberako deialdi orokorrik egingo, orain arte egin den moduan, gradukako deialdiak baizik. "Arrazoia hauxe da: selektibitatean fase orokor bat egon da, ikasle guzti-guztiek egin beharko dutena; eta beste fase espezifiko bat, borondatezkoa, fase orokorrean lortutako nota hobetzeko balio duena. Horregatik, ikasle bakoitzaren azken nota aldatuko da fase espezifikoan egindako gaiek hautatutako graduarekin duten harremanaren arabera", azaldu dutenez. Argazkian, Leioa eta Erandioko campuseko ikastegietako bat.
Hortaz, plaza esleitu zaien graduan matrikulatzeko deituko dituzte ikasleak eta gradu hori eskaintzen duen ikastegian egingo dute matrikula (ikasturte honetara arte, hiru matrikula gunetan, campus bakoitzean bana, egiten zen). Lehen onarpen-zerrenda gaur, larunbata, argitaratuko dute. Zerrenda horretan ikasleari plaza bakarra esleitzen zaio gradu bakarrean eta hitzordua jartzen zaio matrikula dadin. Une horretatik aurrera, ikaslea itxaron-zerrendan geratzen da esleitu zaion aukeraren aurreko aukeretan. Lehenengo matrikula-aldia bukatutakoan (ostegunean, uztailaren 15ean), hutsik dauden plazak errekuperatzen dira, itxaron-zerrendan dauden ikasleei esleitzen zaizkie eta onartuen zerrenda berri bat argitaratzen da. Uztailean, matrikularen bigarren epea, hilaren 19tik 22ra izango da; eta hirugarrena, hilaren 26tik 28ra. Geroago, irailean, izen-emateko beste epe bat zabalduko dute, Selektibitatea edo Lanbide Hezkuntza ezohiko deialdia gainditu dutenentzat.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun