Gaurko entzierroaren zain zeudela, Getxo udalerriko bederatzi lagun atxilotu ditu Nafarroako Foru Poliziak Iruñean. Nafarroako Gobernuak Efe albiste-agentziari emandako bertsioaren arabera, desordena publikoa eta autoritateari desobedientzia eta erresistentzia leporatu diete, Euskal Herriko hiriburuko zezen plazan izandako "liskar" baten harira. Bertsio ofizialari jarraiki, gertaera goizeko 7:30ean izan da zezentokiko tendidu batean, hainbat jende geroago azkenaurreko entzierroan parte hartu duten zezenen etorrera ikusteko zain egon dela. Ordu horretan, Iruñeko udaltzainek eta Gurutze Gorriko kideek bertan ei zegoen liskarraren berri eman diote Foru Poliziari. Hainbat pertsona harmailetako "publikoa iraintzen eta edariak botatzen" egon direla adierazi dute. Argazkian, Foru Polizia iaz, zezen-plazatik 65 lagun kanporatu eta 13 atxilotu zituenean / © Nafarroako Gobernua.
Bertaratuta, poliziek lasaitasuna eskatu omen diete liskarren ustezko egileei baina taldea "baretu beharrean bere jarreran tinko jarraitu du". Hori dela eta, beti Nafarroako Gobernuaren bertsioaren arabera, Foru Poliziak Iruñeko kaleetan "gauean ere arazoak sortu dituzten" Getxo udalerriko bederatzi lagunak atxilotu dituzte. Getxoztarrak Beloso komisariara lekuz aldatu dituzte eta bertan desordena publikoa eta autoritateari desobedientzia eta erresistentzia leporatu dizkiete. Bertan jarraitzen duten edo jada kaleratu dituzten ez dute zehaztu.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun