Txosna bakoitzean ateratzen den etekin ekonomikoa, herrian lan egiten duen kolektiboarentzat izaten da, eta beraz inork ez du aterakin pertsonalik jasotzen, hau da, dirua berriro herrian inbertitu egiten da. Horren harira, txosna ezberdinetan lan egiten duten pertsonek edo txandalariek, musu-truk eta militantziagatik egiten dute lan eta ez dira zerbitzari profesionalak.
Txosnak muntatu eta jaiak hasi baino askoz lehenago txosna jartzen duten kolektiboak txosna batzordean biltzen dira jaiak prestatzeko eta herriari jai eredu berri bat ematen saiatzeko. Beraz, txosnei buruzko oinarrizko informazio hau idatzi eta gero, argi eduki behar da, txosnagunean emakume batekiko jarrera sexista erakusten duen batek edo norbait jipoitzen duen beste batek herriko kolektibo ezberdinen kontra ari dela aldi berean, hilabete askotan zehar egindako lanaren kontra alegia.
Eta esan beharrik ez dago, txosna jarri eta diru bere onura pertsonalerako erabiltzen duen talde batek txosnen filosofiaren aurkako eraso zuzena egiten egongo dela.
Beno, esan beharra badago, edo esateko beharra sentitu dut behintzat, azkenaldian bere munduan edo kapsulan sartuta dauden pertsona askorekin topo egin dudalako eta gero eta galduago ikusten baitut txosna erabiltzaileen jarrera txosnekiko.
Hau ere, izango da Txosna Batzordearentzat etorkizun hurbilerako lana, txosna eta txosnagunearen filosofia berriro transmititu eta helaraztea.
Betitxe Saitua margolariak pasa den igandean Sopela.net-en argitaratutako artikulua
[© Betitxe Saitua - Sopela.net] San Pedroetako ajea pasatzear dagoenean, gainean ditugu jada Larrabasterrako Karmengo jaiak. Hilaren 15etik 18ra jai giroan murgilduko gara berriz, eta gurekin batera ondoko herrietatik etorriko den jende asko eta asko. Imajinatzen dot, txosnagunea jendez gainezka egongo dela urtero lez, eta horregatik aproposa iruditu zait, txosnen eta bere filosofiaren inguruan zeozer aipatzea. Txosnagunea, ondo pasatzeko gunea bada, baina horrez gain errebindikazio eremua dugu, non herriko kolektiboek bozgorailua duten bere eskabideak jendeari igortzeko. Jai gune honetan, jarrera eta eraso sexistak arbuiatzen dira eta azkenaldian bereziki lan egin da jendearen arteko liskarrak ez egoteko. Argazkian, Sopelako txosnetako artxiboko irudia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun