Alkateak umeak animatu ditu Getxo udalerria ezagutzeko eta bertan bizi ahal izango diren familiekin gozatzeko. Aurten 13 ume saharar heldu dira udalerrira, Atfal elkarte getxoztarraren bitartez; Bielorrusiako 3, ACOBIren bitartez; eta Errusiako bat Bikarte elkartearekin etorri da. Ume guztiak oso pozik egon dira harrera ekitaldian. Izan ere, kasu askotan aurtengo izan da euren herrialdeetatik irteteko aukera eduki duten lehenengo aldia eta, beraz, oso errealitate ezezaguna eta desberdina bizitzeko aukera izango dute.
Harrera ekitaldiko argazkiak:
“Hartzen dituzten umeekiko duten konpromisoa eskertu nahi diet familiei, batez ere krisi garai honetan”. Hitz horiekin ongi etorria eman die gaur goizean, udaletxeko batzar aretoan, Imanol Landa Getxoko alkateak (mp3), Tindoufeko (Aljeria) saharar errefuxiatuen kanpamenduetatik, Bielorrusiatik eta Errusiatik heldutako haurrei eta horien harrera-familiei. Tokiko agintariak gehitu du "egoera justuekin urtero konpromiso solidarioa agertzen duten familien eredua ezagutzera eman nahi eta behar dutela erakundeek". Umeek oporrak igarotzeaz gain, haien osasunari on egitea ere bada harrera solidario honen helburua. Izan ere, azterketa medikuak egiten dizkiete, baita arreta eman eta tratamenduak ipini ere. Azkenik, umeek bizi duten errealitateari buruzko informazioa familia getxoztarren artean zabaltzea ere bada asmoetako bat. Argazkian, Imanol Landa Getxoko alkatea heldu berri diren umeekin batera.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun