Gaur hasiko da, Espainiako Auzitegi Nazionalean, Udalbiltzaren kontrako epaiketa. Zazpi urte pasa ondoren, 22 lagun epaituko dituzte Madrilen, tartean hainbat herritako alkate eta zinegotzi, "erakunde terroristako kide izatearen balizko delitua" leporatuta, 10 urtetik 23 urtetara bitarteko espetxe zigorrak tartean. Hain zuzen ere, gaur bertan, aipatu auzia salatzeko elkarretaratzea egingo dute Erandion. Hitzordua 20:00etan jarri dute, udaletxe aurrean. Hala ere, askotan gertatzen den bezala, oraingoan ere herri ekimena ez dator bat tokiko agintarien jokabidearekin. Hainbat udalerritan aurkeztu dituzte mozioak auziperatuak babesteko, baita Erandion ere. Baina mozioa ez da aurrera atera, udalbatzan ordezkaritza (EAJ, PSE-EE eta PP) duen alderdi batek ere ez duelako babestu, jelkideen aldeko bozka nahikoa zenean. Argazkian, lagun bat Udalbiltzaren aldeko marrazkia egiten.
Zazpi urte pasa ondoren, uztailaren 15ean 22 lagun epaituko dituzte Madrilen, tartean hainbat herritako alkate eta zinegotzi, "erakunde terroristako kide izatearen balizko delitua" leporatuta. Auzigai dituzten eginkizunak, baina, Udalbiltzako Batzorde Eragileko kide nahiz langile gisa burututakoak dira. Fiskalak auziperatu bakoitzarentzat 10 urteko espetxe zigorra eskatzen du, 10 urtetan lan edo kargu publiko bat betetzeko debekua eta kostak ordaintzea, ustez erakunde terroristako partaide izategatik. Gainera, lau auzipeturentzat, 5 urteko espetxe zigor gehitua, 12 urtetako erabateko inhabilitazioa eta kostak ordaintzea eskatzen du fiskalak, fondo publikoen erabilpen bidegabea ere egotzita. Bestalde, Dignidad y Justicia delako elkarte ultraeskuindarrak, akusazio partikular gisa, auziperatu bakoitzarentzat 14 urteko espetxe zigorra, 20 urtetako erabateko inhabilitazioa eta kostak ordaintzea eskatzen ditu. Diru publikoaren erabilpen bidegabea egotzitakoei, berriz, 8 urte gehiagoko espetxe zigorra, 20 urtetako erabateko inhabilitazioa eta kostak ordaintzea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun