Imanol Landak esan duenez, zinegotzi popular batek (Luis Hermosa Bilboko zinegotzi popularra, "Deia"-ren arabera) Facebook sare sozialean eskegitako argazkia, hau da, Marisa Arrue eta PPko beste ordezkari batzuk bandera espainolez jantzitako Agirreren estatuaren aurrean irribarretsu eta pozik erakusten dituen irudia “irain larria, doakoa eta onartezina da gure herrian gutxi batzuk bezala oso maitatua, estimatua eta errespetatua den lehendakariarentzat". Bere heriotzaren 50. urteurrena dela eta, Getxoko Udalak "omenaldi hunkigarria" eskaini zion orain gutxi, alkate getxotarrak nabarmendu duenez. Landak azpimarratu duenez, “gertaerak larritasun handia du kargu publikoa den Marisa Arrue duelako protagonista, Getxokoa gainera, Agirre lehendakariaren herrian alkatetzarako aurkeztuko dena”. Alkateak bere buruari galdetu dio “bizikidetzaren eta funtsezko oinarri demokratikoen ze eredu" ematen ari den Arrue anderea, mota honetako portaerekin, "bera bezala pentsatzen ez duenarekiko irainak eta errespetu faltak gidatzen dituen portaerak erakusten”.
Muturreko portaera
Landak gogoratu du Agirreren irudia "Eusko Alderdi Jeltzalea baino harago doala", hil arte erbestean berarekin batera izan ziren "ideologia eta talde guztiek maitatzen, miresten eta errespetatzen dutelako". "Zorionez, muturreko portaera ozpindu horiek ez datoz bat herritar getxoztarrekin, errespetutik desberdinak direnak elkar ulertzearen alde daudelako", gaineratu duenez. Hori guztiagatik, "Getxoko herriaren aurrean duintasun apur batez agertu nahi baldin badu", barkamena eskatzea beharrezkoa dela adierazi dio Arrueri Landak.
Agirre lehendakaria iraintzeagatik getxoztarrei barkamena eskatzea exijitu dio Arrueri Landak
Herritar guztien aurrean barkamen publikoa eskatzea exijitu dio Marisa Arrue Getxoko PPko bozeramaileari Imanol Landa alkateak. Jose Antonio Agirre eta Lekube Eusko Jaurlaritzako lehenengo lehendakaria eta udal agintari getxoztarra (1931-1933) izan zena "era larrian eta onartezinean iraintzea" leporatu dio ordezkari popularrari. Izan ere, joan den igandean, uztailak 11, Hegoafrikako munduko futbol txapelketa Espainiako selekzioak irabazi izana ospatzen ari zirela, Bilboko Ercilla kalean dagoen Agirreren estatua inguratuz eta bandera espainola eskuetan atera zuten argazkia PPko 14 kidek, "Deia" egunkariak gaurko lehen orrialdean argitaratu duenez. Marisa Arruez gain, horren ahizpa Maria Rosario Arrue Gorlizko zinegotzia, Monica Marin Getxoko PPko idazkaria eta Pilar Aresti Espainiako senatari ohi neguritarra ere agertzen dira irudian; beste hainbat udalerri bizkaitarretako zinegotzi eta Bizkaiko batzarkiderekin batera. Argazkian, PPko kide batek Facebook-en igo eta "Deia" egunkariak argitaratutako argazkia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun