Joan den ostiralean, Urko Izagirre Algortako preso ohiari eskaini nahi zioten ongi etorri ekitaldia egitea galarazi zuen Ertzaintzak. Prestaketa lanetan zebiltzan bitartean, 19:30ak aldera, polizia autonomikoaren furgoneta bat hurbildu zen Kasino plazara eta ertzainek ekitaldia debekatuta zegoela jakinarazi zieten bertan zeuden lagunei. "Baimena emanda zegoen ordea, eta baimena agiria ikustean ertzain-buruak esan zuen beraiek ez zutela baimen horren berririk. Hartara, telefonoa hartu eta tarte bat hitz egiten egon ondoren, esan zuen ekitaldia egin zitekeela, baina debekatuta gelditzen zela Urko Izagirreri inolako omenaldirik egitea, baimena agirian haren izena zehazten ez zelako", azaldu du Uribe Kostako Amnistiaren Aldeko Mugimenduak. Ekitaldia irauten zuen bitartean inguruan ibiliko zirela esan zuen poliziak: agindutakoa bete ezean, jendearen kontra oldartuko zirela eta baimenaren eskatzailearen kontrako neurri judizialak hartuko zituztela adierazi zuen. "Beraz, ekitaldia egin zitekeen, baina ezin zen Urko eszenatokira igo, bere izena aipatu, ezin ziren preso politikoen argazkirik agertu, ezta ekitaldiaren ostean deituta zegoen afaria egin ere. Baina manifestazioa egin zezaketela adierazi zuten", errepresioaren kontrako erakundeak nabarmendu duenez. Argazkian, antolatzaileetako bat poliziari agiria erakusten.
Hori guztia jakinarazi ondoren, Ertzaintzaren furgoneta alde batera erretiratu zen. Telletxe plazan Brigada Mugikorraren beste bi furgoneta ere bazeuden. Hala ere, preso politikoen aldeko ekitaldia egin zuten 300 lagunen aurrean. Txalaparta soinuek eta bertsoek eman zioten hasiera saioari. Ondoren, antolatzaileetako batek Ertzaintzak ezarritako debekuak azaldu zituen. Jarraian, euskal preso politiko baten poema irakurri zuten. Gero, Amnistiaren Aldeko Mugimenduko kide batek hitza hartu zuen "Euskal Preso Politikoen Kolektiboak konponbide politikoari begira duen garrantzia" azpimarratzeko. Kolektiboaren izaera eta nondik-norakoak aipatu zituen. Ostean, "Eusko gudariak" abestu eta, ekitaldiari amaiera emateko, Algortako kaleetatik manifestazioa egin zuten, denbora guztian Ertzaintzaren begiradapean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun