Metro Bilbao garraio enpresako zaintzaileekin izandako liskarraren ondorioz, gizon gazte bat zauritu zen joan den igande goizaldean, Larrabasterrako geltokian, tokiko Karmen jaietatik etxera bueltan zihoala. Lekukoek UKBERRI.NETi adierazi diotenez, "badirudi ika-mika zigarro batengatik hasi zela. Gaztea amatatutako zigarroa ahoan ei zihoan metro barrura eta agenteetako batek kendu zionean hasi omen zen eztabaida". Hasieran bi zaintzaile baino ez zeuden, "baina borrekin gazteari mehatxuka hasi zirenean, inguruko jendea segurtasunekoei garrasika hasi zitzaien eta segidan beste sei edo zazpi agente bertaratu ziren jarrera oldarkorrarekin", gaineratu dutenez. Hori ikustean, gaztea korrika hasi zen trenetik irteteko asmoz: "geltokira irteten saiatu zen arren, ateak itxi egin ziren". "Zaintzaileek harrapatzea lortu zuten eta, konturatu orduko, gaztea lurrean botata zegoen, aurpegia handituta eta guztiz odoleztatua zeukala", lekukoek salatu dutenez. Metro Bilbaoren bertsioa, ordea, bestelakoa da. Ertzaintzak jasotako atestatuaren arabera, zaintzaileek diote gaztea izan zela mehatxuka eta erasoka hasi zena. Garraio enpresak horri eutsi dio gaur "Deia" egunkariak argitaratutako albistean. Gazteak zein jagoleek elkarren kontrako salaketak aurkeztu dituzte. Aste honetan bertan izango da epaiketa azkarra.
Lekukoen arabera, beste hainbat lagunei oldartu zitzaizkien zaintzaileak. "Inguruko jendea gertatzen ari zena telefono mugikorrarekin grabatzen saiatu zen, baina hori ikustean jagoleak jendearengana hurbildu ziren mehatxuka, bideoa ezabatzeko esanez", azaldu dutenez. Horien hitzetan, "gaztea lurrean botata zegoen, zaurituta eta bilurrak jarrira. Hala ere, zaintzaileek gaztea inguratu zuten eta zirkuluaren erdian beste bi jagole zeuden gaztea jipoitzen jarraitzen". Tren barruan zegoen iskanbila zela eta, gidariak metroa gelditu behar izan zuen. Denbora gutxira, Ertzaintza bertaratu zen Larrabasterrako metro geltokira. Atestatua betetzeko lekukoei galdezka ibili ziren: "zer o zer ikusi duzue?". "Ezezkoa erantzuten bazenien, hortik alde egiteko esaten zizuten", lekukoek adierazi dutenez. Ondoren anbulantzia bat heldu zen tokira eta ospitalera eraman zuen gaztea.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun