Asteazken honetan, uztailak 21, hasiko da Getxoko Dantza eta Folklore Jaialdia. Aurten, Indiako eta Dagestango taldeak arituko dira eta, ohi bezala, Algortako Itxartu taldeak ere parte hartuko du. Saio guztiak Biotz Alai plazan izango dira gaueko 9etatik aurrera. Sarrera doakoa izango da. Horrenbestez, bihar, Indiako Panghat taldeak emango dio hasiera jaialdiari. 1995etik aurrera bere herri-tradizioa sustatu du, dantza eta musika bereziki, eta arte horiek garatzeko gaitasuna landu du taldekideen artean, Getxoko Kultur Etxeak azaldu duenez. 25 dantza-folkloriko mota baino gehiagotan espezializatu da Panghat. Horiek menderatzeko, zenbait eskualdetako maisuen lana behar izan dute. Dantzaz gain, tradiziozko jantziek ere garrantzi handia dute bere ikuskizunetan eta, hori dela eta, taldekideek euren jantziak diseinatzen eta egiten dituzte. Argazkian, Itxartu taldeak egingo ditu anfitrioi lanak / © Getxoko Kultur Etxea.
Etzi, uztailak 22, osteguna, Dagestango Lezginka dantza taldea arituko da. lezgi etniako dantza ospetsu baten izena hartu du horrek. 50 urteko jarduera bete du konpainiak Tamkho Izrailovek Kaukasoko errepublika horren Folklore Akademia Nazionaleko dantza taldearen artista handienetako batek sortu zuenetik. Azkenik, ostiralean, Algortako Itxartu taldeak itxiko du jaialdia. Iñaki Uriaren eskutik eman zituen lehenengo pausuak. Dantza taldeen egitura eta lana denborarekin garatuz joan da eta gaur egun 40 kidek osatzen dute, heldu zein gaztetxoak kontutan hartuz.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun