Larrabasterrako Karmen jaietan hainbat kalte material izan direla salatu du Sopelako Udalak
Larrabasterran ospatu berri diren Karmen jaietako balorazio "positiboa" egin du Sopelako Udalak. "Antolatutako ekintzetan partaidetza handia egon da, bereziki larunbatean, hilaren 17an", tokiko iturriek nabarmendu dutenez. Hala ere, udal arduradunen arabera, "dena ez da horren pozgarria izan, pertsona batzuek zenbait kalte eragin baitituzte inguruko hiri-altzarietan, gehien bat". Urko kiroldegiko makaldian, iturria kaltetu, paperontzi batzuk apurtu eta kartoia zein papera birziklatzeko ontzia hondatu ei dute. Gaineratu dutenez, zonalde bereko bi zuhaitzek enborretan kalteak jaso dituzte, baita Urko kiroldegiko aldagela berrietako paretak ere, bertatik hainbat lauza kendu dituztelarik. Udalak esan duenez, "kalte horien guztien konponketak 5.000 euroko kostua izango du". Argazkian, kalteak jasan dituen tokietako bat / © Joseba Zubiaur - Sopelako Udala.
Tokiko agintarien arabera, "argi gelditu da pertsona batzuek jabegoari zor zaion begirunerik ez dutela, ez publikoari, ez pribatuari, ezta ekologia edota ingurumenari ere".
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun