Karmen jaietan Larrabasterrako geltokian izandako liskarraren gaineko epaiketa bertan behera geratu da
Ia bi ordu beranduago hasi da Getxoko Justizia Jauregian, joan den igande goizean, Larrabasterrako metro geltokian izandako liskarraren inguruko epaiketa azkarra. Metro Bilbao garraio enpresako zaintzaileekin izandako ika-mikaren ondorioz, gizon gazte bat zauritu zen, tokiko Karmen jaietatik etxera bueltan zihoala. Hala ere, epailearen aurrean jagoleetako bat baino ez da eseri. Horrek ere salaketa jarrita dauka: aurpegia odoleztatuta eta bilurrak jarrita lurrean buruz behera amaitu zuen mutilak jo egin zuela dio zaindariak. Gaztearen abokatuak, baina, epaiketa bertan behera uztea eskatu du, gaurko bistan gertaeren egunean geltokian zein tren barruan jazotakoaren bideo grabaziorik ez zegoelako. Horretaz gain, orduan lanean zeuden zaindarien izenen zerrenda ere galdatu du letraduak. Froga horiek falta zirela aintzat hartuta, gaztearen abokatuaren eskaerari kasu egin dio epaileak. Epaiketa azkarra alde batera utzita, uda ostean izango da falta-judizioa.
Epaiketa bertan behera uztea erabaki aurretik, adostasun batera heltzera premiatu ditu alde biak magistratuak: "biek entregatu duzue lesio partea. Beraz, litekeena da biontzako zigorra egotea", aipatu duenez. Metroko zaindariak agudo heldu zaio aukera horri. Gazteak, ordea, uko egin dio prozedura eteteari. "Inortxo ere kolpatu ez dudala frogatu nahi dut nik", argudiatu du mutilak. Bitartean, jagolearen abokatuak lekuko bezala geltokian zeuden metroko ikuskatzailea eta "esku-hartze azkarreko zaindaria" deitzea eskatu du.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun