Bitartean, Getxoko Udaltzaingoak eta Babes Zibilak neurri bereziak ezarriko dituzte igande honetan, Aixerrotako landetan. Jarduera berezi hori aurreko egunean, larunbatean, 22:00etan hasi eta hurrengo eguneko gauerdia arte luzatuko da. Ospakizun hori dela eta hartuko diren trafikoko neurriei dagokionez, azpimarratu autoak jai eremura sartzen utziko direla bakarrik Paella Eguneko 8:00etatik 9:30ak arte, lehiaketan parte hartuko dutenek paellak prestatzeko behar dituzten gauzak bertara sar ditzaten. Gune horretara, Aingeruaren Etorbidetik eta Gustavo Adolfo Becquer kaletik sartu beharko da. Aixerrotako landak, hartara, kotxez hustuta egon beharko dira goizeko 9:30etik aurrera. Kotxeak Bostgarrena, Santa Marina eta Gabriel Ramos Uranga kaleetatik aterako dira eta, Benta inguruan egiten ari diren lanak direla eta, Maidagan kalerantz ezin izango da joan. Nolanahi ere, egun horretan indarrean izango diren aparteko neurriak modu egokian egongo dira seinaleztatuta. Halaber, Udaltzaingoak elbarrituen autoak aparkatzeko guneak ere egokituko ditu.
Borondatezko alkoholemia kontrola
Gogoratu, bestalde, Gazteria eta Gizarte Zerbitzuetako udal Arloetatik borondatezko alkoholemia kontrol zerbitzu berezia eskainiko zaiela neska-mutilei, 17:00etatik 20:00ak arte. Kontrolgune hori Galeako errepideko oinezkoentzako biribilgunean, Gustavo Adolfo Becquer eta Osaben kaleetako bidegurutze aurrean, egongo da kokatuta. Azkenik, Babes Zibileko hogei lagun inguru arituko dira jaiaz gozatzera joango diren pertsonen ongizatea zaintzen. Neurrien artean, sendatzeko gune aurreratua, lehen laguntzetarako gunea, hiru anbulantzia eta lur orotako bi ibilgailu izango dituzte.
Igande honetan, uztailak 25, ospatuko da 55. Paellen Nazioarteko Lehiaketa, Aixerrotako landetan, Itxas Argia taldeak antolatuta. Santiago egunean, hain zuzen ere. Parte hartzaileek 10:30etatik aurrera izango dute lehiaketan izena emateko aukera. Paellen aurkezpena, berriz, 13:30etik 14:30era egin beharko da. Azkenik, 17:30ean izango da sari banaketa. Bitartean, egongo da zertaz gozatu: txalaparta deia (12:00), UKTEST elkartearen eskutik; aurreskua eta Itxas Argia dantza taldeko txikien erakustaldia (12:05); bertsoak toldoz toldo (13:00), Itxaso Paya, Pello Etxebarria "Bonbero" eta Josu Landetaren eskutik; eta Tor magoaren saioa (16:00), Bizarra Lepoan euskara elkartearen eskutik, hurrenez hurren. Festa egunari bukaera bikaina emateko Amaiur taldeak eskainiko du erromeria, 18:30etik aurrera. Bestalde, ohiko lez, aldarrikapenerako tartea ere izango da: 12:30etik 13:30era, euskal preso politikoen aldeko elkarretaratzea egingo dute Aixerrotako landetan. Argazkian, jendez lepo egoten da Aixerrota Paella Egunean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun