Joan den igandean, hilak 25, Txurdinagan (Bilbo), 42 urteko gizonezko bat atxilotu zuen Ertzaintzak. Ustez, Amelia Amaya Jimenez bikotekidea hil egin zuen. Susmagarriaren ama eta anaia ere atzeman zituzten, gertakizuna estaltzea egotzita. Amaya da emakumeen aurkako indarkeriagatik aurten Euskal Herrian hildako laugarren emakumea. Hilketa hori salatzeko, Emakumeen Mundu Martxako Plataformaren ohiko protokoloari jarraituz, bihar arratsaldeko 7:30erako elkarretaratzea deitu du Bilgune Feministak, Algortako Telletxe plazan. Argazkian, aurreko erailketa bat salatzeko elkarretaratzea Algortan.
Eusko Jaurlaritzaren Herrizaingo Sailak zabaldu duenez, igande goizaldean jakin zuen Ertzaintzak 36 urteko emakumezkoa hil egin zela. Goizeko zazpiak aldera, anbulantzia bat bertaratu zen etxebizitzara eta mediku batek heriotza egiaztatu zuen, baina ezin izan zuen haren zergatia zehaztu. Ertzaintzaren hainbat patruila bertaratu eta, gorpuak zenbait makurdura zituenez, Bilboko Auzitegiko Patologia Zerbitzura eraman zuten eta etxebizitzan zeuden pertsonak identifikatu zituzten: hildakoaren bikotekidea, horren ama eta anaia, hurrenez hurren. Auzitegiko medikuek, autopsiaren bitartez, indarkeriazko heriotza izan zitekeela egiaztatu zuten eta lehenengo ikerketak egin ostean, gizona atxilotu zuten erailketaren ustezko egile moduan. Herrizaingo Sailak adierazi duenez, urruntzeko agindua zuen ustezko hiltzaileak, maiatzean biktimari tratu txarrak eman zizkiolakoan. Gaineratu dutenez, aurretik, beste hamazortzi aldiz atxilotu dute jabetzaren kontrako delituengatik. Horretaz aparte, ama eta anaia ere atxilo eraman zituzten gertakizuna estaltzea leporatuta.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun