Amets Ladislaori gertaeretan "rol nagusia" jokatu izana leporatzen diote. Horregatik, zazpi urteko espetxe zigorra, 5.400 euroko isuna eta 12 urteko gaitasungabetzea ezarri dizkiote. Egurrola, Gutierrez eta Alcocerri, berriz, bosna urteko zigorra jarri diete. Dena den, lauei erakunde terrorista lagundu izana egotzi diete.
Besteak beste, Amets eta Maribelen etxean egondako pintoreak, ertzain batek, EAko zinegotzi ohi batek edota Egurrola Algortako Indabada Mundialean kokatu zuten auzokideek emandako lekukotasunari muzin egin die Auzitegi Nazionalak, Egurrolak sinatutako fakturekin egin bezala. Horren ordez, auziperatuek haien buruaren aurka zehaztasunez betetako deklarazioak hobetsi ditu epai-mahaiak, haienak ez ziren sakeleko telefonoen artean topatutako mezu batzuekin edo beste pertsona batzuenak ziren auto batzuen mugimenduekin batera.
Amets Ladislao eta Ibai Egurrola algortarrak 2008ko abenduaren 8an atxilotu zituen Irunen Guardia Zibilak, Algortakoa ere den Aitor Artetxe ustezko ETAko kideari ihes egiten lagundu izana egotzita. Azken hori egun berean atzeman zuten Gerben, Bagneres de Bigorre ondoan (Pirineo Garaiak). Ladislao eta Egurrolarekin batera, Javier Gutierrez "Guti" leioaztarra ere hartu zuten atxilo, “lanzadera” lanak egin izana leporatuta. Operazio horretan, Guardia Zibilak bi egun geroago atxilotu zituen Marimertxe Alcocer algortarra eta Maribel Prieto berangoztarra. Guardia Zibilaren eskuetan inkomunikaturik egon ziren egunetan "bortizki torturatuak" izan zirela salatu zuten bostek. Bestalde, "2008ko uztailetik azarora", Berangoko bien etxean, Asier Borrero ustezko ETAko kide algortarra ezkutatzea egozten diete Ladislao eta Prietori; baita Frantziara eramatea ere, Egurrola eta Alcocer "lanzadera" lanetan zebiltzala. Egun, guztiak kalean daude, 18.000 euroko fidantza ordainduta.
Prieto aske utzi eta Ladislao, Alcocer, Egurrola eta Gutierrez zigortu ditu Auzitegi Nazionalak
Amets Ladislao, Ibai Egurrola, Mari Mertxe Alcocer eta Xabier Gutierrez "Guti" uribekostarrei 5 eta 7 urte bitarteko espetxe zigorra ezarri diete. Horrela erabaki du Espainiako Auzitegi Nazionalaren Zigor Aretoko Laugarren Ataleko epaileek, gaur Europa Press albiste-agentzia espainolak zabaldu duenez. 18/98 sumarioagatik edota Arnaldo Otegiri egindako iradokizunengatik ezaguna egin den Angela Murillok, Teresa Palaciosek eta Juan Francisco Martelek osatutako epai-mahaiaren arabera, laurek Asier Borrero eta Aitor Artetxe ustezko etakide algortarrak ezkutatu eta garraiatu zituzten 2008an. Maribel Prieto berangoztarra berriz, aske utzi dute, bere aurkako froga bakarra Guardia Zibilaren eskuetan bere buruaren aurka egindako deklarazioa delako. Akusatu guztiek hasieratik "basatiki torturatuak" izan zirela prozesu osoan zehar salatu eta salaketa horiek bere prozedura aurrera jarraitu arren, epaileek ez dute arazorik izan beren deklarazioak eta ustezko torturatzaileen lekukotasunak onartzeko. 64 orrialdeko epaian, magistratuak luze eta zabal aritu dira balizko torturez, "inolako probarik ez" dutela ikusi argudiatzeko. Argazkian, auziperatuei babesa emateko agerraldia.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun