Getxoko Udalak 70.000 euro banatuko ditu Gizarte Zerbitzuekin elkarlanean ari diren 54 erakunderen artean
Getxoko Udalak 70.000 euro banatuko ditu tokiko Gizarte Zerbitzuen Arloarekin elkarlanean ari diren 54 erakunderen artean; iaz baino 20 gehiagoren artean hain zuzen ere, nabarmendu dutenez. Aipatu elkarteak publiko zein pribatuak dira, irabazi asmorik gabekoak, eta horien helburu nagusia bat dator Gizarte Zerbitzuen Arlokoarekin, udal iturrien arabera. Helburuak honako hauek dira: arazoak konpontzeko gizarte zibilaren parte hartzea bultzatzea, udalerrian dagoen elkarteen sarea bultzatzea, gizarteko boluntario-lana bultzatzea eta Gizarte Zerbitzuen alorreko jardueren garapenera zuzendutako proiektuak diruz laguntzea. Horiek lortzeko hainbat jarduera antolatzen dituzte, tartean, baztertutako kolektiboak gizarteratzea eta bazterketa prebenitzea, eta minus-balioa edo bestelako arazoak dituzten pertsonen bizi-baldintzak hobetzea. “Udalak egiten duen lanaren osagarria dira horiek eta horregatik elkarteak indartzeko dugun apustu garbia mantentzen dugu”, nabarmendu du Elena Coria zinegotziak. Argazkian, Elena Coria zinegotzia eta Imanol Landa alkatea Getxoko Urduña kaleko 16. zenbakian zabaldutako Gizarte Zerbitzuen bulegoa aurkezten / © Getxo.net.
Buru ezintasuna duten pertsonen aldeko Bizkaiko elkarteak 5.700 euro jasoko ditu; FEKOOR ezintasun fisikoko pertsonen aldeko Bizkaiko Federazio Koordinatzaileak 4.300 euro; minbiziaren kontrako elkarteak 3.700 euro; Berdintasuna etorkin atzerritarrak gizarteratzearen aldeko elkarteak eta Gizakia Fundazioak 3.500 euro, hurrenez hurren; Filipinetako elkarteak 3.100 euro; AVIFES buru gaixoen eta senideen Bizkaiko elkarteak 2.800 euro; Egintza adin txikikoa babesteko elkarteak 2700 euro; Sendia familiaren aldeko elkarteak eta ASPANOVAS minbizia duten umeen gurasoen Bizkaiko elkarteak 2.500 euro bana; APSORIASIS elkarteak 2.200 euro; AHIDA ume hiperaktiboen familien elkarteak, euskal eta arabiar emakumeen elkarteak eta Harresiak Apurtuz etorkinen aldeko elkarteen Koordinadorak 2000 euro bana. Gainontzeko elkarteek, horien artean, ACAMBIk, Uribe Aldeko Gurutz Gorriak, Beato Domingo Iturrate Fundazioak, Ereaga Fundazioak edo SOS Arrazakeria taldeek 600 eta 1.700 euro arteko diru-laguntza jasoko dute.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun