Ereagako kaia La Ola eta Portu Zaharraren artean urbanizatzeko proiektuan, Getxoko Udalak "legezkotasun osoz" jardun duela adierazi du, 2010eko maiatzaren 28ko epaiaren bitartez, Euskal Autonomia Erkidegoko Justizia Auzitegi Nagusiak. Erabaki horrek Bilboko Administrazioarekiko Auzien 2. Epaitegiak 2008ko martxoaren 11n emandako epaia baliogabetzen du, zeinak, alderdi erreklamatzailearen -Getxoko ezker abertzalea- uziak onartzen zituen adieraziz, hark aurkeztutako deuseztasun-akzioaren aurrean Udalak zegokion prozedura izapidetu behar zuela eta ez hura izapidetzeko onartu ez, egin zuen moduan. Argazkian, Imanol Landa alkatea.
Epaia irmoa da eta, beraz, errekurritu ezina. Udal iturrien arabera, kontra egindako proiektua ez da plangintzako tresna bat, ez eta hirigintza-kudeaketarako egintza ere, baizik eta obra-proiektu bat; ondorioz, ez du erreklamatzaileak eskatutakoa bezalako izapidetzea eskatzen. "EAEANak baieztatzen duenez, ez da prozeduraren erabateko gabezia egon. Izan ere, Udalak jarraitu zuena obra-proiektuari dagokiona da eta hori da, azken batean, kontra egindako udal-egintzak irudikatzen duena", gaineratu dute. “Epai horrekin”, adierazi du Imanol Landa Getxoko alkateak, “Getxoko Ezker Abertzaleak planteatutako eztabaida juridikora itzultzen da Ereagako kaiko pasealekua La Olatik Portu Zaharrera bitartean zabaltzeko obren legezkotasunari dagokionez. Eta juridikoa esaten dut, denbora baita ezker abertzaleak kalean planteatutako eztabaida faltsua Getxoko hiritarrek beraiek ebatzi zutela, oso modu positiboan baloratzen baitute Portu Zaharrera biderako pasealekuaren zabalera berria, oinezko guztion gozagarri dena”. Alkateak aipatu duenez, “atzo Portu Zaharraren zabaltzea zen, gaur, berriz, Getxo Antzokia eta bihar beste edozein proiektu, legezkotasun-kontuak argudiatuz gobernu-taldea higatzea eta hari ospea kentzea soilik nahi baitute Udalaren kudeaketa judizializatuz. Dena dela, horrelako ezerk ez du Getxoren modernizaziorako eta hobekuntzarako gure apustuarekin jarrai dezagun eragotziko".