Ostegunean hasita, Txo erre bitartean (abuztuak 16, 06:00) luzatuko dira Algortako Portu Zaharreko jaiak. Besteak beste, 18:00etan Kasinotik abiatuko den koadrilen jaitsierarekin emango diete hasiera ospakizunei eta ordu eta erdi beranduago Me Kaguen Gutarrak taldeko gazteek, iazko irabazleek, pregoia irakurri eta Txo panpina zintzilikatuko dute. Ordutik aurrera, festa giroa Portu Zaharreko txoko guztiak hartuko ditu. Gauean, kontzertua eskainiko dute bertoko taldeek, 21:30etik aurrera. Oihartzuna, Lehertu Arte, Undefeated eta Kaleko Orroak bandak igoko dira agertokira. Ordu berean, zinema izango dute txikienek Pedro Bilbao doktorea plazan.
Ostiralean, Portu Zaharreko hondartzatxoan urtero egiten saiatzen diren (itsasaldiak uzten badu) eta horrenbeste ikusmin pizten duten ikuskizunetako bat egingo dute, 17:30ean hasita; antzarrak (altxaldiak), alegia. Sokamuturra (zutikako nasapuntakoa) eta nasapuntakoa zein salto txapelketa, berriz, larunbatean egingo dituzte: 11:30ean eta 17:30ean, hurrenez hurren. Egun horretan ere ugariak izango dira haurrentzako jarduerak, eurei eskainitako jardunaldia izango baita. Azkenik, igandeko Pijana Egunerako, ohikoa den marmitako txapelketa antolatu dute. Gauean, berriz, Siroka taldeak emango du kontzertua.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun