Areetako Mesedeetako Ama kaleko aparkalekuan auzokideei 30 partzela emateko eskaera epea ezarri du Getxoko Udalak. “Erabaki honekin inguruko benetako eskariari erantzuteko behar beste plaza kopuruarekin utziko dugu txandakako parking hau, eta horrez gainera, gure kaleetatik 30 kotxe aterako ditugu Itzubaltzeta / Romon eta Areetan aparkatzeko hain beharrezkoak diren 30 leku libre utziz, jakina”, aipatu du Imanol Landa alkateak. Bertakoentzako aparkaleku plaza bat lortzeko baldintzak aurrekoetan izandako berberak dira, itxarote zerrenda baitago. Eskaerak irailaren 6tik aurrera, eta hilabeteko eperen barruan, egin ahal izango dira, “Aparcamientos de Getxo en Romo y Las Arenas” izeneko enpresaren bulegoan, Bilbon (Campo Volantin, 24 zenbakia, 5. solairua). Argazkian, Itzubaltzeta / Romoko Gobela kiroldegiko lur azpiko parkinga / © Getxoko Udala.
Mesedeetako Ama kaleko parkingean 366 plaza daude guztira. Horietatik 179 auzokoentzat dira eta 187 txandakakoak. Itzubaltzeta / Romo eta Areetan lurpeko aparkalekuen udal eskaintza, guztira, 1.165 plazakoa da. Mesedeetako Ama, Santa Eugenia, Gobela eta Santa Anako parkingen artean daude banatuta plazak. Hauetatik, 187 txandakakoak dira eta Mesedeetako Ama kalekoan daude.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun