Urtero bezala, 10:00etan zabaldu dute azoka. Baina, ordu hori baino lehenago, lehenengo bisitariek gain-begirada ematen hasi dira eguneko lehenengo erosketak egiteko asmotan. Handik ordubetera, erosleek azokaren bi salmenta guneak bete egin dituzte. 14:00etara arte, etengabe izan dira salmentak. Bestalde, bertoko trikitilari taldeei eta aurten jarri diren hiru txosnei esker, jai giroa nagusi izan da azokan. Hori guztia, eta goizean izan den eguraldi ona ezinbestekoak izan dira giro itzela lortzeko. Produktuen aniztasuna eta kalitatea izan dira aurten ere San Lorentzo azokaren ezaugarri nagusiak. Barazkiak, txerrikiak eta ahatekiak, lekaleak, txakolina, euskal pastela, tradiziozko okintza, gozokiak, landareak eta loreak, gaztak, eztia eta beste hainbeste produktu egon dira salgai merkatuan. Ohikoa denez, Euskal Herri osotik etorritako ekoizleek bertaratu dira Algortara bere salgaiekin.
Barazki, landare eta gazta lehiaketak
Eguerdian ekoizle askok espero zuten momentua ailegatu da, epaimahaiak barazki, landare eta gazta lehiaketen emaitzak jakinarazi baititu. Iaz bezala, barazki lehiaketan, Urdulizko Adela Andikoetxeak lortu du lehenengo saria, bere ahizpa Mari Angeles Andikoetxearen eta Barrikako Jose Ramon Intxaurtietaren aurretik. Landare lehiaketari dagokionez, Urdulizko Maria Jesus Viteri izan da garaile. Usurbilgo Aranburu hazitegiak eta Barakaldoko Enedina Madariagak eskuratu dute bigarren eta hirugarren saria, hurrenez hurren. Gazta lehiaketan, berriz, Ricardo Murias (Muskiz) atera da garaile, Jesus Aranburu elkartearen (Idiazabal) eta La Lezeko baserriaren (Asparrena) aurretik.
Aurten ere, Algortako San Lorentzo azokak emaitza ezin hobea lortu du. Guztira, 20.000 bat lagun izan dira goiz osoan zehar, abuztuaren 10eko jaia ospatzen duen azoka ezagun horretan, Getxoko Kultur Etxeak adierazi duenez. Aurtengo ekitaldian Euskal Herri osoko 78 ekoizlek parte hartu dute eta 92 postu ezberdin egon dira. "Azokan izandako salmenta bikainak eta urtero jasotzen duen jendetzak argi erakusten dute ekitaldi hori derrigorrezko hitzordua dela baserriko produktuak erosi nahi dituen ororentzat", gaineratu dute kultur iturriek. Ohikoa denez, San Lorentzoko jaia Biotz Alai abesbatzak eskainiko duen kontzertuaren eskutik amaituko da Biotz Alai plazan bertan gaueko 10etan. Argazkian, San Lorentzo azoka aurreko batean.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun