Espainiako Estatuak Indian daukan enbaxadak funtzionario bat bidali du Kaxmirreko Leh hirira, eta horrek egindako lanei esker, dagoeneko hiritik alde egin eta New Delhira joan dira euskal mendizaleak, sor daitezkeen arriskuetatik alde egiteko. Hainbat komunikabidek ziurtatu dutenez, kirolariak Indiako hiriburuko aireportuko hotel batean bilduta daude itzulerako hegazkin bat lortzeko zain. Hala ere, diotenez, ez da lan erraza izango tokiko turista gehienek estatutik alde egin nahi dutelako eta aireportutik soilik 9 hegazkin komertzial aireratzen direlako. "Gainera, uste dut bertan dauden guztiek bere kabuz lortu beharko dutela bueltatzeko billetea, enbaxadak gutxi batzuk eskuratu ahal izan baititu bakarrik", azaldu du getxotarretako baten semeak.
Informazio gutxi
Bi mendizaleen senideak Getxoko Gobernu Taldearen jokabidea salatu dute, "oso informazio gutxi eskaini eta zer egin ez zekitela ere esan baitigute". Ganguren Mendi Taldekoei dagokienez, Galdakaoko Gobernu Taldeak Espainiako Atzerri Ministerioarekin eta Indiako Enbaxadarekin zuzenean kontaktuan jarri omen da, horrela lortutako informazio guztia eskaini ahal izateko haien senideei. "Astelehenean Getxoko udaletxera deitu nuen ea zer edo zer zekiten jakiteko, baina Josu Loroño zinegotziak ezer ez zekiela eta zer egin ez zekiela esan zigun", salatu du Himalayara joandako bi getxoztarretako baten semeak. "Dakidan bakarra da ondo dagoela, bere bi deien eta korreoengatik, ez tokiko gobernuak emandako informazioagatik. Komunikabideengatik ere informazioa biltzen ibili naiz pixkanaka-pixkanaka, baina euskal mendizale guztiak Delhin zeudela jakitean Espainiak Indian daukan enbaxadara deitu dut hori konfirmatzeko. Baina, nire ama eta bere bikotea bere informeetan ez dela agertzen esan dit".
Gaur bertan, Getxoko alkatearen idazkariak deitu dio berarekin bilera bat egin ahal izateko, baina "haiek izandako jarreragatik" ez dela joango azaldu du. Izan ere, Gobernu Taldearen parte handi bat, "zer edo zer egin beharrean, Algortan egin den San Lorentzo azokan ibili dira bueltaka".
Indian harrapatuta geratutako bi mendizale getxoztarrak erreskatatzeko ezer gutxi egitea egotzi diote Udalari
Uholde baten ondorioz, Kaxmir Estatuko Leh hiritik atera ezinik egon dira aurreko egunotan 48 euskal mendizale. Horietatik 46 Galdakoko Ganguren Mendi Taldeko kideak dira. Gainontzeko biak getxoztarrak direla jakin du UKBERRI.NET agerkari digitalak. Bikotea abuztuaren 4ean joan zen bere kabuz aipatu hirira Himalaya inguruan trekkinga praktikatzeko asmoz. Baina, igoerari ekin baino lehen, montzoi-euriek Pakistan eta India inguruan eragin dituzten uholdeekin eta lur mugimenduekin topatu ziren. Hasiera batean, mendizaleen senideak ezin izan ziren haiekin kontaktuan jarri, sakelako telefonoek ez zutelako funtzionatzen. Hala ere, getxoztarretako baten semeak adierazi duenez, "amarekin bi aldiz hitz egin ahal izan dut, bertan dagoen telefono kabina batetik. Eta, nahiz eta denbora gutxi izan, onik daudela eta beste euskal mendizaleekin elkartu egin dela ziurtatu digu". Horretaz aparte, egunean behin posta elektronikoren bat ere bidaltzen diete. Bitartean, Getxoko Udalaren jokabidea salatu dute mendizale bien etxekoek, "oso informazio gutxi eskaini eta zer egin ez zekitela ere esan baitigute". Baieztatu dutenez, gaur bertan, Getxoko alkatearen idazkariak deitu die batzar bat egin ahal izateko, baina "haiek izandako jarreragatik" ez dela joango azaldu du semeak. Izan ere, Gobernu Taldearen zati handi bat, "zer edo zer egin beharrean, Algortan egin den San Lorentzo azokan ibili dira bueltaka". Argazkian, "zer egin ez zekiela" esan zien senideei Josu Loroño Komunikazio zinegotziak.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun