Diseinu Industrialeko lizentziatura dauka Paul Ygartuak eta zilargintzan nahiz urregintzan lan egiteko kualifikatuta dago. 80ko hamarkadan zehar, munduko jendeaz egindako interpretazioek arrakasta lortu zuten, eta arrakasta horretaz baliatuta, Ameriketako Ondare Natiboaren serieak egin zituen edo horma-irudi ikaragarriak (Chemainus, BC eta Nazio Batuen Erakundeak Vancouverren Expo´86an izan zuen pabilioian). Horma-irudiok oihartzun handia lortu zuten nazioarte mailan. Bere margo lanetan, munduko herri nomaden funtsezko baloreak interpretatzen saiatzen da, eta buruaren zein arimaren funtzionamenduak ilustratzeko ahalegin intimoa egiten du. Familiarekin batera joaten da egiten dituen bidaietan. Urruneko lekuak ditu helmuga: Copacabanatik Jerusalemera eta Hawaitik Europara, betiere bisitatutako herrialdeen edertasunak eta, batez ere, toki bakoitzean bizi diren pertsonak kontenplatuz. 90eko hamarkadatik aurrera, Paulek proiektu garrantzitsu askotan egin du lan. Besteak beste, bi horma-irudi erraldoi handi hauetan: "XX. mendeko legendei diosala (Vancouver, Kanada) eta "Gure umeek elkartuta" (Ely, Nevada, AEB). Bere lanak, orain, beste norabide bat du: espresionismo abstractua. Sutsua, grinatsua, koloretsua eta ausarta. Eta hori, bereziki, Jazz estudio berrietan islatzen du, bertan iraganeko eta gaur egungo jazz musikari ahaztezinak erretratatuz. Bere margo lanak bilduma publiko eta pribatuetan egoten dira ikusgai, mundu osoan zehar; eta duten berezko eta benetako balioagatik altxor gisa erakusten dira.
Ikusi Gorlizko Udalak espainolez zabaldutako bideoa:
Paul Ygartua nazioarteko artista oso sortzaile originala da eta lan bikain eta aintzatetsia ekoitzi du. Ingalaterrako Liverpool hiritik hurbil jaio zen, herri txiki batean. Bere aita euskalduna zen, Gorlizkoa, eta bere ama ingelesa. Liverpooleko arte eskola ospetsuan ikasi zuen, John Lennonen ondoan, 60ko hamarkadaren hasieran, eta egunero entzuten zuen The Beatles taldea The Cavern pubean, eguerdi partean. Ygartuak trebetasun berezia du tamaina handiko margo lanak zuzen zuzenean eta proiektorerik gabe egiten. Horrek, noski, muralgile ospe handia eman dio, eta bere lanek urrunetik ere bere artea ikustera datozen pertsonen arreta harrapatzen dute. Herriak biziberritzeko hainbat proiektutan egin du lan. Egitasmo ofizialen artean aipatzekoa da Vancouverreko mundu mailako erakusketan, Nazio Batuen Erakundearen pabilioirako sortutako horma-irudia: “Mundu batua” izenekoa. Erakusketako hamar lan onenen artean izendatu zuten hori. Ahal duen guztietan, Gorlizera, bere herri maitagarrira, etortzen da artista; eta bertan ere erakusgai ditu bere margo lanak. Horiek horrela, Gorlizko Udalak akordioa lortu zuen Ygartuarekin, etorkizunerako geratuko den obra handi bat egin dezan, non eta egin asmo duten udal kiroldegian. Dagoeneko, gai bereko bi koadro eginda ditu herrian, eta bi udal-eraikinetan kokatuta daude: udaletxean eta kultur etxean, hurrenez hurren. Argazkian, kiroldegia izango den udal-pabilioia egokitzeko obrak irailaren bukaerarako amaitzea aurreikusi dute eta dagoeneko bertan dago ikusgai Ygartuaren horma-irudia / © Gorliz.net.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakurleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun