Munduko bodyboarder onenak lehiatuko dira egunotan Sopelan
2010ko abu. 18a, 18:15
Sopelana BBK Pro 2010 munduko bodyboard txapelketa hasteko ordu batzuk baino ez direla falta, ziurtatuta dago munduko hoberenen etorrera, udal iturriek adierazi dutenez. Nahiz eta abuztu honetan olaturik ez egon, badirudi garaiz helduko direla uhinak, ohitura denez, txapelketa horretan benetako ikuskizunaz gozatu ahal izateko. Gainera, munduko bodyboarder onenak uretan ikusteko aukera izango da: Ryan Hardy (Shark Island txapelketa irabazi du pasadan astean), Ben Player (2008ko munduko txapelduna) eta Dave Winchester (2009ko munduko txapeldunordea) australiarrak zein Jeff Hubbard (2009ko munduko txapelduna), Dave Hubbard eta Jacob Romero hawaiiarrak, besteak beste. Eta nola ez, urte guztietan Sopelara gerturatu izan den Reunion irletako Amaury Laverhne; Sopelana BBK Pro-n bi aldiz txapeldun izan dena eta egungo sailkapenaren lehenengoa. Argazkian, iazko txapelketaren irudi bat / © Sopelana BBK Pro.Gaur arratsaldean izen emateak izango dira Sopelako hondartzan. Beraz, lehiakide asko ikusi ahal izango dira uretan entrenatzen. Bihar, osteguna, txapelketa hasiko da, eta espero denez borroka gogorra izango da uretan, irabazleak hartuko dituen mila puntuak orain arte dagoen sailkapena ahoz bera jar dezakeelako. Zalantzarik gabe lehiakideak ez dute erraz izango, dagoen izugarrizko mailagatik. Baina, oraingoan ere, antolatzaileak ziur daude, ez dagoela dena esanda, "ez baititugu pasadan urteko finalerdiak ahaztu behar". Besteak beste, Sopelako Antonio Ortizek eta Zumaiako Alex Urangak hondartzan zegoen jende guztia zutik jarri zuten. Txapelketa Internet bidez ere jarraitu ahal izango da: www.sopelanabbkpro.com.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun