Abuztuaren 26an, osteguna, Itsadarraren eguna ospatuko dute Altzagan. Gauzak horrela, egun osoan zehar, jolas desberdinak izango dira inguru horretan. Ostiralean ere herri bazkaria egingo dute. Apuntatzeko orria (10 euro) La plaza tabernan egongo da, hilaren 25era arte. Bazkari goxoa prestatzeko animatuz gero, goizeko 10:etan La Plaza tabernan bertan lotu dira. Arratsaldean, berriz, plazan erromeria izango da Erdizka lauetan taldearen eskutik, Irailaren 23a plazan, 19:30ak aldera.
Bertsoak, kontzertuak eta ur gerra
San Agustin jaien azken txanpara helduta, Jon Maia, Uxue Alberdi eta Igor Elortzaren bertso saio futurista izango dute gozagarri Altzagara hurbiltzen direnek. Larunbatean, hilak 28, izango da hori, 20:00etatik aurrera, Irailaren 23a plazan. Geroago, txosnetan, Siroka eta Esne Beltza taldeek eskainiko dituzte kontzertuak, gauez. Amaitzeko, igandean, ur gerra galanta izango da kiroldegi inguruko plazan (Europa plaza), eguerdiko 12etan hasita. Ekitaldi horretan zein gainontzekoetan parte hartzeko, jantzi zuri-urdina jartzera deitu dituzte herritarrak Berbotsekoek. Izan ere, euskara elkartekoek esaten duten bezala: "Guk ez badugu egiten, nork egingo du?".
Uda borbor dagoela, abuztuaren 25etik 29ra ospatuko dira San Agustin jaiak (ikusi egitarau osoa udal agendan / pdf) Altzaga herri erandioztarrean. "Aurten ere, euskaltzaleen parte-hartzea ezinbestekoa izango da gure herria gero eta euskaldunago egiteko", adierazi dute Berbots Erandion Euskaraz elkarteko kideek. Gauzak horrela, plan ederra proposatu diete tokiko zein gertuko euskaldun eta euskaltzaleei. Hasteko, jaien lehenengo egunean, asteazkenarekin, berbots-bazkaria egingo dute. Ohi bezala, La Plaza tabernako arkupean egingo dute. Aipatu establezimenduan egongo da izena emateko aukera (10 euro), igandera arte. Hantxe ere jarri dute hitzordua bazkari egunean, 11:00etan, den-dena prestatzeko. Bazkal ostean, berriz, Hegaaize folk taldea ere izango da eurekin, ahaztu barik 13:00etan plazan txupinazoa izango dela. Bestalde, arratsaldez, La Plaza tabernan 20:30ean hasita, tabernaz-taberna herri osoan ibiliko da Kantagunea. Ordu erdi lehenago parrillada izango da txosnetan. Argazkian, Kantagunea Altzagan barrena.
Irakurle agurgarria:
HIRUKA gure eskualdeko euskara hutsezko hedabide bakarra da; egunero 10 udalerriren berri ematen dugu, eta hilabetero doan duzu aldizkaria kalean, tokiko komertzioetan zein erakunde publikoen egoitzetan. Eta orain doan bidaliko dizugu etxera nahi izanez gero! Proiektua bizirik jarraitzeko, ezinbestekoa dugu zu bezalako irakuleen babesa eta ekarpen ekonomikoa.
Egin zaitez HIRUKAlagun eta gozatu euskaraz!
Izan zaitez HIRUKAlagun