Hainbat kirol jardueraren bitartez jendartearen ezaugarrietan sakondu dute EHUko tesi batean

Erabiltzailearen aurpegia
Jendarteak zentzua ematen dio kirolari. Hau da, kirolak jendarteak dituen ezaugarrien ispilu dira. Hala dio Asier Oiarbide Jarduera Fisikoaren eta Kirolaren Zientzien Fakultateko irakasleak EHUn bertan aurkeztu duen doktore-tesian. "Mendi-zeharkaldi, aerobic eta futbolaren etnomotrizitateak" izena du lanak. Kirol-jarduera bakoitza praktikatzen den testuinguru kulturalean txertatuta ulertzean datza etnomotrizitatea; ikerketa honen kasuan, euskal jendartean txertatuta. Kirolaren eta kirolaren testuinguruaren arteko lotura hori baliatu nahi izan du Oiarbidek. Hala, mendi-zeharkaldi, aerobic- eta futbol-jardueretatik abiatuta, euskal jendartea sakonago ezagutzeko bidea ireki nahi izan du. Argazkian, Asier Oiarbide / © EHU.
Hain zuzen ere, behaketa parte-hartzailean oinarritu da ikertzailea bere tesia aurrera eramateko. Aipaturiko hiru kirol-praktiketan izaten diren gertakizunen deskribapena egin du, batetik, eta kirol horien barne- (non eta nola jokatu, araudia…) eta kanpo-logikaren (kirol horretaz gizartean egiten den interpretazioa, daukan sinbolismoa…) analisia, bestetik.

Kirola, norbera jendarteratzeko

Aztergai hartu dituen hiru kirol horiek euskal jendartearen ezaugarriak azaleratzen dituztela ikusi du Oiarbidek. Horrenbestez, kirolak ez dira besterik gabe praktikatzen; eraikin kulturalak dira. Hori horrela, beste ikuspuntu batetik ere erreparatu dio tesi-egileak auziari: berak dio kirolak balio duela herritarrek jendartearen mentalitatea bereganatu dezaten, edo kirola jendarteratzeko tresna indartsua dela, bestela esanda. Izan ere, kirol-sistema jendartean txertatuta dago. Ondorioz, kirol-jarduera batean parte hartzera doan pertsona batek jokoaren barne-logika hutsari dagozkion galderei (non, zer, nola, norekin, zerekin…) erantzun behar dienean ere, jendartearen barrutik erantzun behar izaten die galderoi. Jendarte bakoitzak kirolariaren rolari ezaugarri sozial jakin batzuk atxikitzen dizkio.

Hain zuzen ere, rol sozial hori errendimenduko kirolariarena edo aisialdikoarena izan daitekeela nabarmendu du Oiarbidek, kirolaren arabera. Hala, futbolariek errendimenduko rol soziala bereganatuko lukete, eta jokoan ariko lirateke. Zeharkaldietako mendizaleak eta aerobicean aritzen diren kirolariak, aldiz, aisialdiko rol sozialaren jabe lirateke, eta jolasean ibiliko lirateke, ongizatea helburu. Tesi-egileak gogorarazi du hiru kirol-jarduera besterik ez duela aztertu bere tesian, eta kirol gehiago aztertu beharko liratekeela ikerketa osatzeko.

Egileari buruz

Asier Oiarbide Goikoetxea (Lazkao, 1967) Soin Hezkuntzan lizentziatua da. Joseba Etxebeste Otegi EHUko Jarduera Fisikoaren eta Kirolaren Zientzien Fakultateko Gorputz eta Kirol Hezkuntza Saileko irakaslearen zuzendaritzapean idatzi du tesia. Gaur egun, Oiarbide bera irakaslea da sail horretan. EHUn bertan egin du tesia.

Garai latzak dira. Ia egun batetik bestera gure bizimoduak hankaz gora jarri ditu birus batek, eta kolokan daude gauza asko. Hedabideontzat ere ez dira garai gozoak, noiz eta gure lanaren beharra inoiz baino agerikoagoa denean. Horregatik, zure laguntza materiala ere behar dugu aurrera jarraitzeko.

Honenbestez, HIRUKAlagun egitera animatzen zaitugu, urtean 35 euroko ekarpena eginda, edo gure 5. urteurrena dela eta martxan ipini dugun Eman Bostekoa HIRUKAri kanpainan parte hartzera (bost euroko ekarpena eskatuko dizugu). Horretarako, jarri gugaz harremanetan administrazioa@hiruka.eus helbidera mezu bat idatziz.


Izan zaitez HIRUKAlagun